Gobierno di coalicion (MEP-POR-RED), pero tambe fraccion di MEP a trece nan banda riba e caso di ekiponan y artefacto costoso cu a somenta for di bestuurskantoor. Algun detencion a cay di hendenan cu a yega di traha den e departamento di prensa di e gobierno anterior. Nan a haya diferente reaccion entre otro cu e caso aki ta trata di persecucion politico. P’esey nan a dicidi di trece mas aclaracion riba e asunto aki.
E prome cu a papia riba e asunto aki tabata prome minister, Evelyn Wever-Croes kende a bisa cu atendiendo cu peticion di prensa, el a referi na e asunto aki. Nan a haci e denuncia of keho mirando cu cantidad di ekipo di gobierno pa balor di mas cu 100 mil florin a somenta for di bestuurskantoor, prome cu e traspaso di gobierno a tuma luga. Pero unabes cu e denuncia aki ta den man di instancia hudicial e investigacion ta bay den forma imparcial.
“Ningun di nos no tin algo di bisa of haci cu e investigacion aki di nos institutonan”, el a bisa.
Igualmente el a laga sa cu e keho cu nan a haci dilanti autoridad hudicial competente no ta un sorpresa, ya cu nan ta papiando riba e tema aki dos siman continuamente. El a agrega cu e dia cu nan a drenta bestuurskantoor tabata ‘obvio cu ta falta hopi ekipo’. Nan a haci e keho oficial riba e ekiponan cu ta falta. Esaki a keda anuncia siman pasa ora cu el a sostene un reunion cu procurador general (PG).
Sra. Wever-Croes a expresa cu como mandatario responsabel, nan mester haci e denuncia ya cu nos ta papiando di placa di pueblo. E suma di 100 mil florin den ekipo valioso y perdi ta un suma ‘cu no a bay pa e muchanan cu tin mester pa ehempel pa un desayuno prome cu nan ta bay scol…’. El a enfatisa cu e gobierno aki ta para pa ordo y respet.
El a bisa cu na final di cuenta nan kier recupera e ekiponan ‘perdi’, ya cu nan mester di nan pa por realisa nan trabou den gobernacion. Pa tal motibo el a haci un apelacion na esunnan cu tin ekiponan cu ta propiedad di gobierno pa trece nan bek. “Si bo sa cu ta ekiponan cu ta pertenece na gobierno, si bo no ta trece nan bek, nos por ta papiando di ladronicia.”
Tambe e ta haci un yamado na hefenan di departamento cu por a haya mueble of ekipo regala pa e ministernan pa ‘duna nos un señal cu nan ta cerca bo pa nos sa cu e ta den un caminda den gobierno’.
Minister di Husticia
Di su banda, minister di Husticia, Andin Bikker (POR) a bisa cu nos sistema hudicial ta un sistema imparcial y integro. Den su condicion di minister di Husticia e no tin niun autoridad pa bay mete den caso individual. El a agrega cu ora un keho ta wordo entrega e sistema ta independiente, y nan ta canalisa e keho of denuncia manera ta necesario riba nan responsabilidad. P’esey e ta lamenta cu e caso aki ta wordo tilda di persecucion politico. “Esaki absolutamente no ta e caso!.”
Igualmente el a bisa cu durante e ultimo siman como gobierno nobo cu a caba di sinta, nan ta dedicando atencion na e echo cu nan a tuma un bestuurskantoor ‘cu no tin e propiedadnan di pueblo of pais Aruba, caminda mester ta’. E ta culpa e mandatarionan anterior cu no a percura pa un traspaso di mandato ordena. Nan mester canalisa e proceso of denuncia cu ta cay bou nan responsabilidad pa asina haya e propiedad di pais Aruba bek, caminda unda mester ta.
El a bisa cu tin hasta ambtenaar cu a bay cu articulo cu ta propiedad di pais Aruba y te hasta kibra documentonan locual a haci cu nan mester bay dilanti corte. “Gobierno saliente no a percura pa salvaguardia propiedadnan di pais Aruba di un manera ordena”, segun minister Bikker. E ta argumenta cu como gobierno nobo nan tin e responsabilidad pa purba di haya bek e propiedadnan di pueblo, di bestuurskantoor y di pais Aruba.
Fraccion MEP
Te hasta parlamentario Daphe Lejuez (MEP) a referi na e caso aki. Aunke e no tabatin mucho detaye riba desaroyo di e caso aki, el a laga sa cu no ta trata absolutamente di ‘persecucion politico’ of algo personal. E ta haya logico cu si un persona ta bay traha den un caminda y bo doño di trabou ta cumpra material pa bo traha cu ne, esaki absolutamente no ta nifica cu bo ta bay cu ne, ora bo relacion di trabou ta termina.
Den e caso aki ta natural cu e doño di trabou ta haci un denuncia ora cu e ta ripara cu e materialnan no t’ey, y un investigacion mester cuminsa cana. Den e caso specificamente aki gobierno a pone un denuncia, pero e instancia concerni ya sea OM (Ministerio Publico) ta esun cu ta haci e investigacion hudicial, el a bisa. Si tin persona deteni esaki kisas tin di haber cu e persona ey lo por sa mas informacion tocante e caso. “Mi no ta kere cu necesariamente por papia di culpabilidad, pero mas bien di responsabilisacion of duna informacion”, segun parlamentario Lejuez.
El a bisa cu prome minister a yega di reitera cu no ta persecucion politico y hasta a ofrece cu si persona aki ta dispuesto pa trece e material bek, lo tuma esaki nan.
Ekiponan a yega bek
Durante ora di ayera tardi, gobierno a emiti un comunicado unda nan ta bisa cu ‘prome ekiponan cu a worde “fia” for di bestuurskantoor a cuminsa yega bek’.
“Esaki ta un parti hopi chikito cu awe mainta a wordo entrega pa un coordinador di Ex Minister Mike de Meza. E coordinador en cuestion no ta esun cu originalmente a bay cu e ekiponan, pero mas bien a haci lo corecto di trece nan bek pa su doño cu ta Land Aruba. E ekiponan aki tawata den man di e persona encarga cu prensa di Ex Minister Mike de Meza”, e comunicado ta bisa.
Segun e comunicado di gobierno, aparentemente ta hopi hende liga na e gobierno anterior lo ta canando rond cu un susto basta grandi, considerando cu tin un investigacion andando, pa asina recobra e mas di 200 mil florin na ekipo cu a disparce na momento cu Gabinete Mike Eman II a baha.
E pregunta cu ta keda colga ta: A haci lo corecto di tuma e ekiponan bek mientras tin un investigacion andando? Posiblemente por considera e acto ey como ‘heling’ conforme ley. Nos redaccion lo sigui riba e storia aki cu ta birando mas interesante cada biaha.
