Katie Bouman a lidera desaroyo di un programa di computer cu a haci imagen di vanguardia posibel. E potret remarcabel, mustrando un halo di stof y gas 500 miyon triyon di kilometer for di Tera, a wordo revela diaranson.

Pa Dr. Bouman, su creacion tabata e realisacion di un empresa cu a kere ta imposibel.

“Mirando sin por kere mientras e prome imagen cu mi a yega di haci di un black hole tata den proceso di reconstruccion”, el a skirbi riba Facebook hunto cu un potret.

El a cuminsa crea a aligoritmo tres aña pasa mientras e tabata studiante na MIT. Eynan, el a lidera e proyecto, asisti pa un team di e Computer Science and Artificial Intelligence Laboratory di MIT, e Harvard-Smithsonian Center for Astrophysics, y e MIT Haystack Observatory.

E imagen, capta pa e Event Horizon Telescope (EHT) – un red di ocho telescop liga na otro – a wordo produci cu aligoritmo di Bouman.

Den e oranan despues di e revelacion di e potret, Bouman a bira un sensacion internacional, cu su nomber un tendencia riba Twitter. Bouman tambe a ricibi elogio riba rednan social di MIT y e Smithsonian.

Pero Bouman, awo un assistant professor of computing and mathematical sciences na e California Institute of Technology, a insisti cu e team cu a yud’e tambe ta merece e credito. E esfuerso pa captura e imagen, uzando telescop na sitionan desde Antartica te na Chile, a involucra un team di mas di 200 cientifico.

“Niun di nos por a haci e nos so”, el a bisa CNN. “Nos a logra danki na cantidad di persona diferente cu background diferente.”

Con su aligoritmo a crea e imagen?
Poni simpel, Bouman y otronan a crea un serie di aligoritmo cu ta converti data telescopico den e potret historico comparti mundialmente.

Den matematica y ciencia di computer, un aligoritmo ta un proceso of set di regla uza pa resolve problema. Ningun telescop riba su mes ta suficientemente poderoso pa captura e black hole, pues un red di ocho a wordo set up pa haci esey uzando un tecnica yama ‘interferometria’.

E data cu nan a captura a wordo warda den centenares di hard drive cu a wordo manda na centronan di procesamento central na Boston, Merca, y Bonn, Alemania.

E metodo di Bouman di procesa e data ‘raw’ aki tabata instrumental den e creacion di e imagen.

El a lidera e proceso di test mediante cual aligoritmonan multiple cu ‘diferente asuncion den nan’ a purba di recupera un potret for di e data.

E resultadonan di e aligoritmonan a wordo analisa pa cuatro team separa pa crea confiansa den e veracidad di nan hallazgo.

“Nos ta un ‘melting pot’ di astronomo, fisicista, matematico y ingeniero, y esey ta locual a tuma pa logra algo cu a kere tabata imposibel”, Bouman a bisa.