A bira conoci e sentencia den e bezwaar entrega door di ex-director di DIMAS, Kathy Paskel, contra e decision di minister Glenbert Croes pa nenga Paskel acceso na tur edificio y propiedad di DIMAS.

Den un decision di dia 3 di mei 2023, cual ta e decision den disputa, Minister Glenbert Croes a dicidi di nenga acceso inmediato na Kathy Paskel na tur sitio, edificio, tereno, vehiculo y ambiente digital di trabao di Departartamento di Integracion, Maneho y Admision di Stranhero (DIMAS) pa un periodo di tres luna.

Paskel a entrega un keho contra esaki dia 2 di juni.

Considerando e posicion di e partidonan
Paskel no por djis acepta cu a nenga acceso y a bisa cu a impone esaki inhustamente. E no a comete ningun malconducta, manera evidencia den e rapport di Departamento di Recurso Humano (DRH).

Croes di su banda a basa e decision pa nenga acceso, en resumen, riba eventonan cu individual of colectivamente ta constitui malconducta cu a merece un investigacion disciplinario. Croes a bisa cu a perde confiansa den Paskel, y cu un colaboracion fructifero ya no ta posible.
E comportamentonan cu a describi, segun e sentencia di corte, ta relaciona na instruccion pa emiti declaracion di operacion di ley; pasa representacion legal na terceros; e caso di Sra. Ingri Juliana Ramirez Rodriguez; emision di VTA en conexion cu eventonan cu a tuma lugar dia 15 di april 2023; y un di dos valsheid in geschrifte.

E caso aki tabata trata si e minister tabata hustifica pa nenga acceso di Paskel na establecimento y areanan digital di DIMAS.

Hechonan

Via decreto dia 16 di februari 2007, Gobernador di Aruba a dicidi di nombra Paskel como director di DIMAS cu efecto dia 1 di juli 2006.

Via decreto ministerial di 15 di october 2021, e minister a establece e grupo di maneho DIMAS. Via decreto ministerial di 10 di maart 2022, e minister a revoca e decreto aki.

Via decreto ministerial di 15 di maart 2022, e minister a dicidi di establece un Management Team, encarga entre otro di supervisa e maneho general (diario) di DIMAS. A determina cu e maneho operacional diario di DIMAS lo ta responsable na e Management Team, cu tambe ta duna guia y conseho na DIMAS. E miembronan nombra den e Management Team ta Lirriane Frias, Edgar Arends, Jennifer Tromp, y Henry Baarh.

Paskel a entrega un obhecion contra e veredictonan di 10 y 15 di maart 2022, y a rekeri alivio interino. Via un veredicto di corte a suspende e decretonan aki te cu por a tuma un decision riba e obhecion (bezwaar).

Den un decision dia 3 di mei 20223, e minister a dicidi di inmediatamente nenga Paskel acceso na tur edificio, tereno, vehiculo y ambiente digital di trabao di DIMAS pa un periodo di res luna. E decision ta duna como motibo varios “suceso” cu a conduci na e deterioro di confiansa cu mester existi entre e hefe di departamento y e minister, “cu ta haci cu cooperacion entre nos no ta posible mas.”

Den esaki, e minister a menciona varios incidente.
E prome tabata corespondencia entre DIMAS y e bufete di abogado contrata pa e minister, Wix Advocaten, cu a tuma lugar entre october y december 2022. Sinembargo, a nota cu tabata te maart 2023 cu a ricibi confirmacion di e solicitud di e minister, sin cu a duna un clarificacion pa e tardansa.

A menciona ademas cu e minister a duna instruccion pa cierto casonan wordo manda pa representacion legal na Wix Advocaten, incluyendo caso relaciona cu aplicacion di asilo. E minister a tuma e decision y a comunica esaki na Paskel. Sinembargo, Paskel “a consider’e necesario pa anula e decision di minister y no regarda su instruccion specifico,” y a nombra otro representantenan legal. Di esaki a manda copia na otro minister y director di DWJZ, “no solamente sin permiso di bo minister como autoridad competente pero tambe conteniendo cantidad di eror.”

E minister ta menciona tambe cu despues di a ricibi reportahe y keho tocante falta di respuesta pa aplicacionnan di permiso dia 13 di maart 2023, a duna instruccion na Paskel pa catch up cu e maneho of procesamento di cierto aplicacionnan pa permiso. El a bisa cu Paskel a duna un overview di tur aplicacion cu a keda pega na diferente departamento of etapa di proceso di evaluacion, y a duna un analisis no solicita di e “motibonan” pakico e sistema a faya. Sinembargo, e no a cumpli cu e trabao pa catch up.

Pa loke ta e caso di Ramirez Rodriguez, dia 20 di maart 2023 a duna Paskel instruccion por escrito pa emiti un permiso temporal di residencia na Rodriguez, pendiente e resultado di e proceso di verificacion na embahada Hulandes na Colombia. Segun e minister, sin permiso, Paskel a dicidi di revoca e permiso temporal en cuestion. E minister ta considera esaki como algo cu ta mina su autoridad.

Tocante e VTA pa eventonan cu a tuma lugar dia 15 di april 2023, e minister a keda acerca pa un grupo di musico cu a bin Aruba pa un concierto. Despues a sali na cla cu organisadornan di e concierto, den consulta cu DIMAs, a entrega aplicacion pa permiso pa e musiconan dia 5 di april 2023. Nan a ricibi invoice pa e tarifanan aplicable dia 11 di april 2023, y a paga nan e siguiente dia, 12 di april. Sinembargo, no a procesa e VTA y no a emiti nan (na tempo.)

E ultimo problema cu Croes a menciona ta e acusacion di valsheid in geschrift. Esaki ta trata di un rapport cu Paskel a entrega contra e minister pa falsificacion, cual “incidentalmente no a conduci na proceso criminal di OM”, y Paskel a dicidi pa entrega un di dos keho di falsificacion contra e minister tocante un cantidad di VTA cu e minister a emiti. Despues di esaki tabatin un investigacion lunas largo di OM cu en resumen no a revela nada otro cu e hecho cu e minister a actua den marco di su autoridad, “esaki tabata e ultimo gota pa mi,” segun Croes a bisa.

Evaluacion
 Corte a enfatisa cu nenga acceso ta un medida provisional cu tin como meta principal pa preveni interferencia cu un investigacion (disciplinario) riba posible iregularidadnan y tambe tin meta pa mantene orden y paz dentro di e departamento. Pasobra e medida aki ta afecta e posicion legal di e ambtenaar en cuestion y nan relacion cu coleganan, esaki mester ta lo mas limita posible y proporcional na e naturalesa y alcance di e investigacion. E decision pa impone e medida interino aki mester contene e base legal, e motibo precies, e momento di comienso y e duracion spera di e medida interino.

Corte a nota cu e minister a determina e duracion di e nengamento di acceso imponi riba e ambtenaar na tres luna. Segun ley estableci, un duracion rasonable pa nenga acceso ta seis siman cu e posibilidad di un extension. Den e caso aki, door di impone pa nenga acceso pa un duracion di tres luna directamente, loke ta implica un modo di suspension, e minister no a eherce su due diligence.

Corte a considera cu for di e documentonan y e audiencia, por conclui cu tabatin un investigacion riba representacion legal for di dentro di DIMAS, e funcionamento general di DIMAS y un investigacion riba dos caso specifico. E resultadonan di e investigacion riba supuesto mal conducta ta documenta den un rapport di DRH cu fecha 31 di juli 2023. Ora a cuestion’e, e ambtenaar a declara na e audiencia cu DIMAS ta trata un averahe di 15mil aplicacion anualmente, di cual ta otorga entre 87% y 90%, y cu tabatin un peak den aplicacion pa asilo na 2019. Un atraso a sucede pa motibo di falta di personal.

E resultadonan di e investigacion riba supuesto malconducta ta documenta den e rapport di DRH. Den e rapport ta conclui cu Paskel no a comete ningun mal conducta cu ta hustifica un medida disciplinario. Den opinion di e corte, pues no tabatin base pa impone e medida interino di nenga acceso riba Paskel, conduciendo na e anulacion di e decision aki.

Decision
 Pues corte a dicidi cu ta sostene e obhecion di Paskel, ta anula e decision di e minister pa nenga Paskel acceso na DIMAS, y a duna orden pa e minister paga e costonan legal di Paskel, calcula na Afl. 1,400.