Un documento a keda publica den Nature dia 22 di juli, cu ta subraya estudionan anterior mustrando cu ni e droga di malaria hydroxychloroquine ni chloroquine ta preveni SARS-CoV-2 – e virus causando Covid-19 – di replica su mes den celnan di pulmon.

Mayoria di persona probablemente ta corda cu hydroxychloroquine a bira enfoke di un cantidad di test clinico despues di declaracionnan di presidente Mericano cu lo por ta algo cu lo ‘cambia e wega’. Na e momento ey, e tabata parce di basa su declaracion riba storianan di anecdota,c omo tambe algun estudionan trempan y hopi limita den cual tabata parce cu hydroxychloroquine tabata yuda pashentnan di Covid-19 recupera.

Hopi persona den campo antiviral, incluyendo mi mes, a cuestiona e validez di ambos, y de hecho, un di e documentonan despues a keda rechasa pa sociedad cientifico y e editor di e journal cu a publik’e.

Desde e tempo ey, HCQ tin un altibaho. Inicialmente FDA a propone e medicamento pa uso di emergencia. Despues FDA a reverti su decision na momento cu a cuminsa haya varios repote di morto causa pa aritmia di curason. E noticia ey a stop varios test clinico. Sinembargo, algun cientifico a sigui studia e medicamento cu speransa pa haya un cura pa e virus mortal aki.

Con a haci e trabou
 Cientificonan na Alemania a conduci un estudio nobo, unda a test HCQ riba un coleccion di diferente tipo di cel pa determina pakico e medicamento aki no ta preveni e virus di infecta humano. Nan hallazgo claramente ta mustra cu HQC por blokea coronavirus di infecta celnan di riñon di macaco berde Africano. Pero no ta inhibi e virus den cel di pulmon humano – e sitio principal di infeccion pa e virus SARS-CoV-2.

Pa e virus por drenta un cel, tin dos mecanismo – uno, na momento cu SARS-CoV-2 su proteina di spike ta pega na e receptor ACE2 y ta hinca su material genetico den e cel. Den e segundo mecanismo, ta absorbe e virus den un sorto di compartimento special den celnan, yama endosome. Dependiendo di e tipo di cel, algun, manera cel di riñon, mester un enzym yama cathepsin L pa e virus por infecta exitosamente. Den cel di pulmon, sinembargo, un enzym yama TMPRSS2 riba superficie di e cel ta necesario. Cathepsin L mester di un ambiente acidico pa funciona y permiti e virus infecta e cel, mientras TMPRSS2 no.

Den e cel di riñon di e macaco berde, tanto HCQ como chloroquine ta reduci e acides, cu ta deshabilita e enzym cathepsin L, blokeando e virus di infecta e cel di macaco. Den cel di pulmon humano, cu tin nivel hopi abou di enzym cathepsin L, e virus ta usa e enzym TMPRSS2 pa drenta e cel. Pero como cu e cel ey no ta controla pa acides, ni HCQ ni CQ por blokea e virus di infecta e pulmon ni stop e di replica.

Pakico esaki ta importante
 Esaki ta importante pa varios motibo. Di prome, hopi tempo y placa a ser gasta studiando un droga cu hopi cientifico a bisa di cuminsamento no lo ta efectivo den mata e virus.
E segundo motibo ta cu e estudionan cu a reporta actividad antividal pa HCQ no tabata den cel epithelial di pulmon. Pues, nan resultado no ta relevante pa estudio di infeccion di SARS-CoV-2 den humano.

Kico awo?
 Mientras cientificonan ta sigui investigando remedi nobo como tambe purbando di duna proposito nobo na esunnan bieu manera HCQ, ta critico pa investigadonan tuma tempo pa pensa riba diseño di nan estudio.

En resumen, esunnan di nos trahando den desaroyo di droga antiviral mester tur tuma un leccion di e estudio aki. Ta importante pa no solamente enfoca nos esfuersonan riba droganan cu directamente lo stop replicacion viral, sino tambe studia e virus den e sitio primario di infeccion.