(AP)—Kate, Prinses di Wales, tin cancer y ta hayando kimoterapia, segun el a revela diabierna den un anuncio sorprendente cu a sigui despues di algun siman di speculacion tocante su salud y unda e ta.
E prinses a revela su condicion den un mensahe video graba diaranson na Windsor y publica diabierna. Esaki a bin despues di speculacion feroz riba red social desde januari, ora el a ser hospitalisa pa un operacion abdominal no specifica. Kate a puntra pa “tempo, espacio y privacidad” mientras e ta hayando tratamento pa un tipo di cancer no specifica cu dokternan a descubri despues di kico el a describi como un operacion “grandi.”
“Mi ta bon,” el a bisa. “Mi ta birando mas fuerte tur dia por medio di enfoca riba cosnan cu ta yuda mi bira mas bon.”
No a mira Kate publicamente desde Pasco te ora un video a surgi e siman aki di e cu su casa, Prins William, heredero di e trono. E video a mustra nan saliendo for di un tienda cu ta bende productonan cultiva riba e tereno di e famia real Windsor.
E noticia aki ta un otro golpi pa e famia real desde cu e anuncia luna pasa cu Rey Charless III tabata hayando tratamento pa un cancer no specifica cu a descubri mientras e tabata hayando un procedura pa prostaat.
Rey Charless a bisa cu e ta “orguyoso di Catherine pa su curashi pa papia tocante su condicion,” segun un declaracion publica pa Buckingham Palace. E rey, ken a ricibi tratamento di prostaat den e mesun hospital y na mesun momento cu Kate a haya su operacion, a keda den “contacto cercano cu su nuera stima” durante e ultimo simannan.
E rey y Reina Camilla “lo sigui ofrece nan amor y apoyo pa henter e famia durante e tempo dificil aki,” e palacio a bisa. Prinse Harry y su casa Meghan, ken tin un relacion tenso cu William y Kate desde cu nan a muda bay California den 2020, a desea e prinses bon. “Nos ta desea salud y sanamento pa Kate y e famia, y ta spera cu nan por haci esaki den priva y na paz,” nan a bisa den un declaracion.
Prome cu diabierna, Kensington Palace a duna tiki detaye tocante e condicion di Kate cu e excepcion di bisa cu e no ta relaciona na cancer, e operacion tabata exitoso y recuperacion por mantene e prinses for di bista publico te cu april. Kate a bisa cu a pensa cu su condicion no tabata relaciona na cancer te ora cu testnan despues di operacion a revela e diagnosis. “Esaki claro a bin como un shock grandi, y William y ami ta haciendo tur cos posibel pa procesa y maneha esaki den priva pa bon di nos famia jong,” el a bisa.
Por medio di papia directamente na e pais y mundo tocante su condicion, en bes di publica un declaracion via e palacio, Kate a ofrece un nivel di intimidad y transparencia cu no ta tipico pa un miembro di e famia real y por yuda calma informacion incorecto. E publicacion di e rey tocante su condicion tambe tabata notablemente habri pa standardnan real.
E anuncio a bin despues di e comienso di temporada di Pasco, cual lo proteha e muchanan for di cubrimento di e noticia.
