Tin e financiamento cla pa cuminsa renoba e refineria y e proposicion pa tuma e operacion for di Refineria di Aruba, RDA ta cla, salvo algun detaye tecnico. Asina Karl Welch di Quanten Consortium Aruba LLC, QCA, a bisa Bon Dia Aruba ayera.

Tin e fondonan, dos biyon dollar, pa reconstrui e refineria y despues pa adapt’e di tal forma cu por cuminza produci gasolin, diesel, jetfuel y otro producto kimico. “Fase uno y dos lo sosode simultaneamente. Alabes, tin e financiamento pa fase 3 cu ta nifica cu den 20 a 25 aña ta transforma e refineria productonan cu ta limpi, manera gasnan butano y metano, lng. Esey ta otro biyon y mey di dollar,” Welch a sigura “Nos ta 100 porciento cla y 100 porciento sigura di financiamento ora cu firma e acuerdo. Y RDA a papia cu nos financiadornan na dos ocasion caba.”

Karl Welch a bisa cu e financiadornan ta un grupo di famia cu a pone e placa disponible, pero a agrega cu e no ta den libertad e momentonan aki pa divulga e grupo na comunidad. Sinembargo, RDA ta na altura, pa por haci nan analisis propio.

Eleccion a trece pausa

Welch a bisa cu no tabatin nada cu a stroba e proceso, otro cu eleccion. QCA a sigui cu e trabounan pa yega na un acuerdo, pero a dicidi pa tuma un distancia pa motibo di eleccionnan na Aruba. No tabata kier a crea impresion cu e negociacionnan tabata unicamente pa duna un Gobierno un empuhe politico. “Nos no tabata kier crea e impresion cu nos lo kier a influencia eleccion. Pues di Mei te memey di Juni nos a baha e cantidad di combersacion cu nos tabata hiba. Nos a scoge pa warda. Despues di eleccion, nos a renegocia e proposicion ariba algun punto tecnico. Practicamente nos a yega na un acuerdo, y mester finalisa algun detaye.”

Algun di e puntonan tin di haber cu e garantia di presencia di e grupo na Aruba. Segun Karl Welch, e intencion ta pa e acuerdo ta solido cu ta e base necesario pa sigura cu e actividad na e refineria ta uno pa tempo hopi largo. “Pasobra nos ta hinca asina hopi placa aden, nos kier tur e detayenan tecnico na nan lugar.”

Dos di e companianan mas grandi di mundo den construccion di refineria cu ta KBR y McDermott y Honeywell, cu conoce e refineria di Aruba den tur detaye, mester bay de acuerdo tambe cu e detayenan tecnico, hunto cu RDA. “Quanten Aruba lo tin e propiedad, y dia cu nos bay, sea ta den 43, 53 of 63 aña lo bolbe pa Aruba. Y esey ta den e contract.” QCA segun e contract tambe lo sigura cu e tereno di refineria lo keda den un bon estado pa usa despues, Welch a bisa. “Ta detayenan asina tin cu caba di finalisa den e contract.”

Karl Welch a bisa cu RDA ta pendiente pa Prome Minister caba cu su rondanan di formacion di Gobierno pa reuni cune y asina cu esey tuma luga, e lo no dura mas cu siete dia pa bin dilanti cu e acuerdo final.

Michael Williams

Ayera a circula documentonan unda QCA lo mester a paga un asina yama Bridge Loan Investment na Dynamic Energy Solutions, LLC cu Sr. Alfred ‘Michael’ Williams ta representa. E documento no tabatin e parafo di partidonan envolvi. E tabata un proposicion pa sigura almacenamento na e refineria. E compania Dynamic Energy Solutions lo a percura pa e almacenamento pa cual QCA lo mester a paga 10 miyon dollar.

Locual tambe a circula ta un asina yama Non-Disclosure Agreement, un NDA, unda Sr. Williams di Dynamic Energy Solutions y Jeff Meyers di Quanten ambos a pone nan firma. Welch a bisa cu tabata un amigo na Aruba cu a pidi pa e cera conoci cu Sr. Williams kende tambe lo tabatin ideanan pa e refineria. “E persona a bisa mi pa duna Williams un oportunidad, pasobra Aruba mes no ta haci esey. E lo tin contacto y conocemento.” Welch a bisa cu el a acepta y nan a intercambia informacion y a traha un contract pa e trabounan cu e dos companianan lo a haci hunto, ademas di e NDA. E trabou conhunto no a cristalisa, a pesar di 15 siman di negociacion y combersacionnan. Y contra e propio contenido di NDA, Williams a publica e documento cu ta exigi secresia di ambos partido. “Mi a wak cu el a publica e documento cu ta bisa cu e combersacionnan mester keda confidencial,” Welch a comenta. “E combersacionnan cu Alfred Williams no a yega ningun caminda y mi a stop e contacto.” Welch a bisa cu e tabata na altura cu hopi na Aruba tabata considera Alfred Michael Williams basta controversial, pero pa motibo cu e enfoke semper tabata pa traha cu Arubiano, y cu ta Arubianonan mester forma parti di e grupo di 1800 trahado cu mester lanta e refineria, e tabata kier a traha cu Dynamic Energy Solutions. “Pero nos no por a yega na un acuerdo y te eynan a yega cu e combersacionnan.”

Hendrik Croes y WEB

Karl Welch ta nenga cu QCA ta traha cu oficina di abogado Croes, Wever y Ruiz, di mr. Hendrik Croes. “Mi ta compronde cu Sr. Croes ta abogado di RDA, pero e no ta nos abogado.”

Welch tambe a bisa cu tur e discusionnan cu ta circulando na Aruba riba uso di LNG y WEB no tin nada di haber cu Quanten Consortium Aruba LLC.