Kapel Alto Vista a keda cla hopi lihe danki na ayudo di comunidad

Awe den oranan di mainta Aruba a lanta cu e noticia cu Kapel di Alto Vista a wordo vandalisa un biaha mas. Pero den menos di 5 ora casi tur cos tabata limpi caba danki na e ayudo di comunidad pa laga e luga santo aki manera e mester ta.

Ora e ekipo reportero di Bon Dia Aruba a yega na e luga por a mira con e murayanan, vloer y bankinan a wordo haya mensahenan cu ta parce di algun persona cu no ta kere den dios y cu a tuma e libertad di expresa esey riba e luga aki.

A logra di papia cu Robert Jeandor ken ta e persona encarga di e kapel. El a declara cu ora el a yega trempan mainta banda di 5or manera e ta haci tur dia, el a haya un desagradabel sorpresa skirbi riba e bankinan y muraya di e kapel na unda por wak cu e kapel a wordo susha un biaha mas.

“Nos a pasa esaki varios biaha caba y nos ta kere cu ta birando un poco di mas” Jeandor a splica.

Asina mes, el a señala cu esaki no ta e manera pa e cosnan aki pasa. “Nan a skirbi e numbernan 666, di cosnan diabolico y kapel no ta esey, esaki ta un luga sagrado”. Ademas el a menciona cu si un persona no ta di acuerdo cu e religion catolico, laga e cosnan di dios keto y no haci cosnan di e sorto aki vooral den un di e luga na unda hopi turistanan ta yega tur dia.

Danki na e ayudo di un compania di servicio di limpiesa cu a acudi pa e yamada di Jeandor cu a haci e luga limpi di un manera ‘pura’ e murayanan, banki y vloer a keda sin detayenan di e vandalismo pa asina kapel por ricibi e turistanan manera tur dia. “Pa e turistanan no wak e cos aki cu no ta bunita”, Jeandor a bisa.

Na e momento cu Bon Dia Aruba tabata presente por a mira con algun persona a yega e luga pa duna un man, haci donacion di verf y otro materialnan, como tambe companianan y esun cu a yega di biaha ora e noticia a keda conoci trempan mainta. “Akinan bo por wak con e hende ta stima kapel di Alto Vista”, Jeandor a expresa.

Tambe, a surgi comentarionan riba rednan social cu esaki no ta prome biaha cu kapel Alto Vista a pasa pa un incidente asina y cu lo por pasa atrobe. Di esaki Jeandor a informa cu a papia di instalacion di camara di siguridad varios biaha caba pero ta existi e dificultad cu e kapel ta ubica na un luga separa, den di medio ambiente na unda no tin coriente y si lo instala e camaranan tambe nan lo por wordo vandalisa.

“Ohala cu esey no bolbe pasa tampoco, pero cu e situacion aki esey por bin dilanti pa nos haci’e”, Jeandor a comenta.

Di mesun manera, el a laga sa cu tin hopi hende cu kier haci donacion y unico cos ta cu si no tin coriente na kapel pa haci esey lo costa hopi placa, segun Jeandor a sigura.

Pa loke ta trata den futuro, el a bisa cu te ainda e mester papia pa wak kico por wordo dicidi pa asina pone e kapel un tiki mas den bista di un sistema di siguridad pa e tipo di cosnan asina no por pasa mas. “Hasta a papia cu esunnan cu ta biba cerca pa nan pone cierto camara pa por wak ken ta pasa pa bay via kapel y asina e camara por capta ken ta yega na e luga aki”, el a expresa.

Pa finalisa, Jeandor a trece dilanti cu e no ta compronde con e hende ta haci e actonan aki cu nan mes no ta haci na cas, sino nan ta haci’e den un luga di dios cu no ta algo pa wega.