(AP) – Rapper, productor di musica y disenador di paña Kanye West a pone su rancho y perfil di su negoshinan den Wyoming na benta.
The West Ranch, anteriormente conoci como Monster Lake Ranch, a drenta mercado riba dialuna pa 11 miyon dollar. E propiedad tin 16 kilometer cuadra di tereno habri, yen di sero y mata.
E propiedad tin riu, un cushina comercial, un cabina, un facilidad pa cabay, coral y un pista di go kart segun e lista di DBW Realty.
E anuncio di benta a bini despues cu West a bende 7 propiedad comercial den Cody pa mas di 3.2 miyon dollar, e Cody Enterprise a reporta.
E rancho, cual tin tereno adicional, cual ta propiedad di gobierno, tabata na benta pa 13,3 miyon dollar prome cu West a cumpra esaki den aña 2019, aunke no ta conoci cuanto el a paga p e propiedad. Wyoming su ley no ta provee informacion publico tocante benta y cantidad di placa paga den compra di propiedad.
West a muda di California na Wyoming den aña 2019, y a cuminsa basa por lo menos algun di su negoshinan di paña den Cody, un ciudad di mas o menos 10,000 hende, na e parti oost di Yellowstone National Park.
E no a keda cla si e propiedad su benta ta nifica cu West ta mudando fuera di Wyoming, of si esaki ta solamente pa reorganisa su mes y su negoshinan basa na Cody. E no tin ningun informacion di contacto ni tampoco publicista cu informacion pa por cantacta West ni pa ricibi comentario.
West, ken tin 44 aña di edad, a haci peticion legal pa cambia su nomber di Kanye, pa e nomber cu tur hende ta yama su persona, “ye”, y tambe a entrega peticion di divorcio di Kim Kardashian West. E pareha tin 4 yiu hunto, North, Saint, Chicago y Psalm West.
