Rapper Kanye West a entrega documentonan pa aparece riba e papeleta presidencial na Louisiana na november.
E entrega di documento di West diabierna, net prome cu e deadline, ta lista su mes como candidato pa e ‘Birthday Party’ hunto cu su candidato pa vice-presidente, Michelle Tidball, segun The Advocate a reporta. Incluyendo West, tin sikiera 11 candidato presidencial di tercer partido of independiente cu a entrega pa aparece riba e papeleta na Louisiana prome cu e deadline diabierna 4:30pm.
E rapper a anuncia su candidatura independiente luna pasa den un tweet riba Dia di Independencia despues di publicamente debati e idea publicamente. Su campaña a entrega documento na Comision Federal di Eleccion pa participa menos di dos siman despues. Pero campaña di West a lucha pa cumpli cu deadline y aparece riba e papeleta na varios otro estado, incluyendo Wisconsin. Deadline pa entrega ya a pasa na seis estado prome cu West a anuncia su candidatura.
Oficialnan di Louisiana no a revisa e documentonan inmediatamente. A diferencia di otro estadonan, Louisiana no ta rekeri candidatonan independiente pa obtene miles di firma riba un peticion di nominacion pa aparece riba e papeleta. Na luga di esey un candidato por paga un suma di $500 pa entrega.
The Advocate a reporta cu un yamada na e number lista den e documentonan no a haya respuesta. E documentonan di West a lista un PO Box na Wyoming como adres pa e campaña. Tidball, kende ta describi su mes como un ‘life coach biblico’ ta di Wyoming, y West tin un mansion y rancho di 1,400 acre na e estado.
Peticion di West pa aparece riba e papeleta ta inclui un lista di ocho residente di Louisiana cu lo sirbi como elector potencial den colegio electoral si e rapper gana e voto presidencial den e estado. Ningun ta parce di tin un historia activo den politica di Louisiana. Seis di nan ta lista como republicano; e otro dos a lista nan mes sin afiliacion na un partido.
Den otro estadonan, operativonan Republicano y sostenedonan di presidente Donald Trump a traha pa reforsa candidatura di West y sigura su puesto riba e papeleta. Criticonan ta acusa candidatura di ultimo ora di West – y e aparente sosten cu a ricibi di partido Republicano – di ta un intento pa horta voto di nominado presidencial Democrata, Joe Biden, specialmente den estadonan clave. Trump a tuma estado di Louisiana den eleccion di 2016 pa casi 20 punto porcentual.
