Kanye West ta riba papeleta presidencial na Oklahoma, pero ainda ta incierto si e ta campañando pa e presidencia.
Un representante di e superstrea di rap a entrega e suma di $35mil diaranson, e fecha limite pa aparece riba e papeleta dia 3 di november. Hunta Electoral di estado di Oklahoma a confirma su posicion den un tweet: “Candidato presidencial independiente, Kanye West a cualifica pa e papeleta di Eleccion General na Oklahoma.”
E entrega ta yega un dia despues cu estratega di eleccion, Steve Kramer a bisa New York Magazine cu West tabata retirando di e eleccion.
Pero TMZ a reporta diaranson cu campaña di West a entrega un ‘Declaracion di Organisacion’ cu Comision Electorial Federal.
West, ken ta casa cu strea di reality Kim Kardashian, a anuncia su candidatura presidencial den un tweet dia 4 di juli. “Nos mester realisa awo e promesa di Merca door di confia Dios, unifica nos vision y construi nos futuro”, West a bisa. “Mi ta candidato pa presidente di Merca.”
Pero e rapper di ‘Late Registration’ ya a perde e deadline pa aparece riba e papeleta den un cantidad di estado. West a contrata Kramer pa pone su nomber riba e papeletanan den estadonan cu ainda ta habri pa haci entrega.
