Notarionan Hulandes y dirigentenan den e sector di trust Hulandes a hunga un rol importante den e sistema di soborno internacional di compania di construccion Oderbrecht.
E actornan aki a haci posibel cu un cantidad di 10 miyones di euro por a drenta Hulanda, asina ta mustra di comprobantenan di estadonan di cuenta, emailnan interno, y centenares di contract. NRC a haya acceso na 13 mil documentonan di consortio di periodismo internacional ICIJ y e organisacion di noticia Ecuatoriano La Posta. E documentonan aki ta bin di e sistema di soborno organisa cu e compania Brazilero tabata mantene, cual a cay den man di un rapport di investigacion di polis di Andorra.
Te den detaye e polis di Andorra ta detaya un red di soborno operando internacionalmente, manera cu ta un pelicula. Ta trata over di miyones cu ta bay di un parti di mundo pa otro, over di un ruman di ex presidente di Uruguay y sobornonan cu eventualmente ta bin na luz di dia.
Entre un gran cantidad di sospechosonan y companianan nombra, rapport policial di Andorra di fin di 2017 tambe a saca nomber, fecha di nacemento, y number di paspoort di 6 ciudadano Hulandes. 3 di nan na e momento ey tabata personanan grandi den e sector di trust na Hulanda. Henk van W. y Gerben van den Berg entre nan ta doño nan di 5 kantoor di trust Hulandes. Van den Berg tambe ta director di e kantoor di trust na Den haag, Pan-Invest.
