“Kai Kai” Williams ta haci 50 aña den Little League

“Kai Kai” Williams  ta  un persona basta conoci riba tereno deportivo, danki na su trayectorio di 50 aña como coach y promotor den mundo di baseball local pa nos muchanan y hobennan .

For di tempo cu e tabata un mucha y el  a cuminsa hunga baseball nan a yam’e “Kai Kai”. E mes no sa pa kico, pero masha poco sa conoce su nomber real mes: Karel Hubert Williams.

Amor pa baseball  

Cu edad di 8 aña, Kai Kai a cuminsa practica softball banda di su cas. Pero danki na su omo cu a mir’e y a hinc’e den baseball, te ainda e ta casa cu e deporte aki.  E nunca por a imagina cu e encuentro aki lo nifica hopi pa su bida.  E aña aki e ta cumpliendo 50 aña den e mundo di baseball di Little League.  Ta hopi mucha cu a cuminsa lansa, batea of catch un bala di baseball a pasa den man di Kai Kai como nan prome coach.

E cinco decadanan aki cu Kai Kai tin den baseball, el a  disfruta di dje. E ta haya cu baseball a bira un gesto di Dios p’e, pasobra e satisfaccion ta grandi y el a yega conoce mundo. El a biaha for di Canada te China. Tambe el a bay  Noord, Centro y Sur America, pues el a biaha hopi dor di baseball. El a haya chens, pero e no bira un hungado profesional, pero e ta sinti su mes un profesional den e mundo di deporte di baseball pa e triunfonan el a yega di conkista.

Un triunfo  importante cu el a haya ta esun di forma su famia hunto cu su señora. Pa  Kai Kai baseball a forma su persona den su carera cu el a dedica na nos muchanan y hobennan. “Si awe mi ta sali for di baseball of mi ta sali fei deporte, mi ta masha contento cu loke mi a haci den deporte”, el a bisa.     

Disciplina y formacion

Den tur su trayectorio e ta haya cu e satisfaccion mas grandi ta cu mañan e mucha cu a bay training cu ne, of cu e por yud’e den su bida real, ta un persona drechi den nos comunidad. Ta asina cu awendia tin hendenan profesional cu a bira discipulo di Kai Kai tempo cu nan tabata mucha y hoben deportivo den baseball.

Algo cu Kai Kai tin bon cla ta cu nunca el a bira coach di su propio yiunan; y esaki e ta haya cu ta e secreto cu a permiti cu ainda e ta dunando su aporte pa e deporte aki. Semper el a coach yiu di hende scapando nan di mal caminda y mal tentacion. P’esey 50 aña trahando boluntariamente pa amor na e deporte aki ta algo di admira.  E tin 50 aña den Little League y 45 aña e ta coach Little League bay ariba. Fuera di Little League e ta dedica su tempo y experiencia cu e muchanan special di Special Olympic y e ta director nacional di nan, locual e ta gusta e ambiente ey.

“Ami ta hacie di mil amor. Mi a mira hopi mucha cu a bira abogado, polis, meneer di scol”, el a bisa.

Pero tambe el a yega di wak e banda negativo tambe. El a mira hungadonan potencial cu a hunga p’e cu a bay den  baho mundo. E trabou di un coach ta den practica e trabou di un trahado social. Como coach  y pa e respet cu e muchanan tin p’e, el a  purba hopi biaha di rescata nan for di e sistema di  mal caminda.  Pero e coach mester ta un rol model pa e mucha of hoben tambe. “Ma dicidi cu tanten mi ta traha cu yiu di hende y tanten mi ta den deporte mi no ta huma ni bebe y mi a want’e te awe… Mi kier ta un ehempel pa esun cu mi ta dirigi na dje”, el a bisa.

E ta haya cu deporte ta un instrumento di formacion pa nos muchanan y hobennan. Algo peculiar cu Kai Kai ta  mantene como disciplina ta e manera cu un atleta ta bin cerca dje. “Si bo ta bin hunga baseball bo mester ta bisti como un beisbolista”. Cerca dje niun hungado ta yega cu renchi horea, flanel manga cortico, tampoco cu carson cortico. Nan ta reglanan cu e ta mantene pa e muchanan di Little League te cu AA cu e ta training  y e ta dirigi te awe. E ta kere cu nan ta reglanan basico cu ta yuda engrandece e deporte aki bek.

Trofeonan y reconocimento

Pa Kai Kai su trofeonan mas grandi ta un mucha cu a bira un promesa grandi pa Aruba y awe ta hoben y figura importante den mundo  di baseball. E ta bisa cu masha orguyo cu e merito cu su persona a haya den baseball ta cu e prome grandes liga di Aruba a sali for di su organisacion y team: Eugene Kingsale.

“Esey ta e honor  mas grandi cu mi ta kere cu mi por a haya den baseball”, el a declara cu hopi emocion. Mescos cu den Little League, Kai Kai ta den  e prome seleccion cu a bay representa Aruba oficialmente como pais autonomo den Reino Hulandes na Puerto Rico.  Tambe e tabata den e prome seleccion di Aruba cu na 1987 a bay hunga den e Weganan Panamericano caminda  e bandera di nos pais a zwaai na Merca. Na 1986 Aruba a gana e derecho aki na Guatemala, despues cu nos isla a sali for di e constelacion di Antia.   

Kai Kai ta kere cu su carera den baseball tin hopi cos pa e sinti su mes satisfecho di loke el a haci pa e deporte aki riba nos isla. Pero aunke e ta hopi satisfecho pa su trabou desinteresa den baseball, Kai Kai  ta spera semper cu na Aruba nan lo a wak su trabou manera debe ser. Pero den su caso aparentemente a wordo cumpli e frase: “Niun hende ta profeta den su propio tera”. Sinembargo algun par di luna pasa door cu el a cumpli 50 aña den Little League y 45 aña como coach; den e convencion mundial e  presidente di e organisacion Little League International a dicidi di organisa un homenahe p’e.

Kai Kai ta bin  atende e convencion aki durante 35 aña consecutivamente, sin faya un aña so. E hubileo aki a coincidi cu su 50 aña den Little League y 45 aña como coach,   y pa tal motibo Kai Kai a haya un invitacion  for di organisacion Little League International pa haci e prome lansamento pa habri un wega na Williamsport (Pensilvania) . E dia ey el a wordo entrevista door di e canalnan grandi di deporte manera ESPM y el a haya te hasta un “standing ovation” for di publico, el a aparece riba big screen … un combinacion di echo cu a bira algo inolvidabel y un emocion grandi p’e.

E ta spera cu tin mas Arubiano cu por haya esey entre nan Sr. Braulio Wester  kende ta e persona mas bieu trahando cu Little League y cu masha poco reconocimento a haya.  P’esey Kai Kai den su entrevista na Merca a duna honor na e trabou cu Sr. Wester ta bin haciendo pa Little League na Aruba. “P’esey ora ma bay Merca den mi entrevista ma trece esey dilanti cu e persona cu mi ta haya cu Little League mester reconoce prome cu mi ta e Sr. Braulio Wester”.

 No ta cuestion cu e ta tras di condecoracion of reconocimento ya cu semper el a traha gratis y  desinteresadamente. “Nunca mi a cobra un mucha cu a bin y cu ma dune mi conocemento di baseball un cen preto. Y esey ta dañando nos baseball aworaki!”, el a bisa na Bon Dia Aruba .