(AP) — Ex-actor di ‘Empire’, Jussie Smollett ayera a nenga cu el a falsifica un atake racista, anti-gay contra su persona na downtown Chicago, testiguando na su huicio cu ‘no tabatin engaño’.
Smollett a testigua na su huicio pa cargonan cu el a gaña polis di Chicago tocante e atake den un intento pa rechasa testimonio dañino di dos ruman siman pasa. Nan a bisa cu Smollett, kende ta color scur y gay, a orkestra e engaño na januari 2019 pa haya publicidad, dunando nan $100 pa suministro y instruyendo nan pa pone un cabuya rond di su nek y grita insultonan homofobico. Nan tambe a bisa cu Smollett a duna nan un cheque di $3,500 pa ehecuta e plan.
Pero Smollett a bisa cu el a skirbi e cheque pa conseho di training y nutricion di un di e rumannan, Abimbola Osundairo, mientras e tabata bay ta fuera di e ciudad, no como pago pa Osundairo y su ruman homber ehecuta e atake.
Contestando su abogado di defensa si el a paga Osundairo pa algun engaño, Smollett a contesta: “Nunca”. E tambe a bisa ‘absolutamente no’ contestando si el a duna Osundairo y su ruman $100 pa suministronan.
Smollett tambe a testigua cu Osundairo a bis’e di un steroid herbal cu ta curasha perdida di peso pero ta ilegal na Merca. El a bisa cu Osundairo a bisa e actor cu por dun’e un tiki secretamente mientras e tabata di biahe na Nigeria.
Osundairo a testigua cu Smollett a mand’e un mensahe di texto – cual e hurado a mira siman pasa – papiando di ‘den secreto’, y cu durante e combersacion ey Smollett a puntr’e tocante ayudo pa prepara e atake. Smollett a bis ayera cu e mensahe tabata referiendo na e steroid ilegal, y cu el a usa lenguahe cu Osundairo a usa anteriormente.
Abogadonan di defensa a sugeri cu despues cu e rumannan, Abimbola y Olabingo Osundairo tabata cuestiona pa polis tocante e supuesto atake, nan a pidi Smollett $1 miyon cada un pa no testigua contra dje den corte.
Abogadonan di Smollett tambe a argumenta cu polis di Chicago a pura pa husga na momento cu a presenta cargonan contra Smollett, y a sugeri cu un tercero por tabata involucra den e atake.
Testiguando ayera, Smollett a bisa cu el a conoce Abimbola Osundairo na 2017 na un club, unda el a haya sa cu Osundairo tambe tabata traha riba set di ‘Empire’. El a bisa cu nan dos a usa droga hunto y a bay na un bathhouse, unda Smollett a bisa nan a ‘make out’. Durante tempo, el a bisa cu nan a usa mas droga y participa den actonan sexual hunto. Osundairo a testigua siman pasa cu e no tabatin un relacion sexual cu Smollett.
Smollett a bisa cu el a conoce Olabingo, pero nan no a papia y ‘el a sorto di spanta mi’.
Fiscalnan ta bisa cu Smollett a falsifica e atake pasobra e no tabata contento cu e respuesta di studio di ‘Empire’ pa e cartanan di odio cu el a ricibi. E carta tabata inclui un dibuho di un figura colga, cu un arma, y e palabra MAGA – un aparente referencia na e slogan di presidente e tempo ey, Donald Trump, ‘Make America Great Again’. E rumannan Osundairo a testigua cu Smollett a bisa nan pa grita ‘Esaki ta pais MAGA!’ durante e atake falso.
Smollett, di 39 aña di edad, ta acusa di seis cargo di delito di conducta desordena pa haci loke fiscal a bisa ta un reporte falso cerca polis tocante e atake – un cargo pa cada biaha cu el a duna un reporte – na tres agente diferente. E delico clase 4 ta carga un sentencia di hasta tres aña di prison.
