(AP) — Jussie Smollett a cuminsa un sentencia di 150 dia di prison, pa falsifica un crimen di odio den su contra, den status protegi, separa di otro detenidonan y observa pa camaranan di seguridad y un agente, segun autoridadnan di prison a bisa durante weekend.
Trahadornan di departamento di Sheriff inmediatamente a hiba Smollett na Cook County Jail riba diahuebs anochi despues cu hues James Linn a sentencia e actor, di color scur y gay, na 30 luna di libertad condicional – cuminsando cu un termino di cinco luna den prison – pa gaña polis cu e tabata victima di un atake racista y homofobico.
Smollett a keda insisti riba su inocencia y a sugeri cu e por wordo mata den prison. “Mi no ta suicida. Si algo pasa mi ora mi bay eyden, mi no a hacie mi mes”, el a bisa.
Sentencia di Smollett por pone fin – pendiente di apelacionnan – na mas di tres aña di drama legal despues di e reporte di e actor na polis, bisando cu dos homber a batie y a grita insulto racista y homofobico riba caya na Chicago, y despues a core bay.
El a cuminsa su sentencia inmediatamente despues di ricibi su condena diahuebs.
Den un declaracion diabierna, oficina di sheriff di Cook County a bisa cu ta tene Smollett den custodia protectivo – tipico pa hende cu ‘potencialmente por ta den riesgo di sufri daño pa motibo di e naturalesa di nan cargonan, nan profesion of status di notoriedad’.
Smollett tin su propio cel, monitoria pa camaranan di seguridad y un agente staciona na e porta bistiendo un body camera, segun e oficina di sheriff. Ta permiti pa Smollett pasa ‘tempo substancial’ den areanan comun pa usa telefon, mira television y interactua cu personal, pero otro detenidonan no ta bay ta den areanan comun cune.
Smollett tabata enfrentando hasta tres aña den prison pa cada un di e cinco cargonan di delito di conducta desordena – e cargo pa gaña polis – di cual el a keda condena. El a keda declara inocente di un di seis cargo.
