Dialuna atardi Koningin Wilhelmina Fonds Aruba, hunto cu Fundacion contra Cancer di Prostaat Aruba, a duna un conferencia di prensa tocante un charla cu lo tuma luga diasabra awor. Asina mes, nan a duna di conoce cu testnan di sanger pa detecta cancer den homber a aumenta den lunanan pasa.

Leticia Tromp, Vocero di e fundacion, a bisa cu diasabra dia 16 di november lo tuma luga na Alhambra un charla encuanto cancer di prostaat y cancer di pecho, desde 9or di mainta te cu 11.30 cu diferente oradornan.

Durante e charla, Fundacion Koningin Wilhelmina Fonds Aruba lo splica loke nan ta haci diariamente den comunidad, pero tambe lo tin diferente specialista, manera Dr. Williams cu ta Radiologo, Dr. Daryanani cu ta un Oncologo, Dr. Leon Urologo y tambe lo tey Fundacion contra Cancer di Prostaat di Aruba.

Jurgen Benschop, Presidente di Fundacion contra Cancer di Prostaat Aruba, a comenta cu desde september nan a cuminsa cu e campaña pa conscientisa e comunidad riba kico ta cancer di prostaat, pero tambe con hende por haci e test pa sa si tin e malesa.

Di mesun manera, el a duna di conoce cu a ripara cu durante añanan, e topico di cancer di prostaat ta un tabu den comunidad; y como fundacion, nan trabou principal ta pa conscientisa tur hende riba e topico y tambe informa con pa haci test pa check of dobel check y keda check, pa asina wak si tur cos ta na ordo pa garantisa un comunidad sostenibel.

Benschop a anuncia cu a reuni despues y a cuminsa cu e campaña cu varios urologo, caminda cu nan a trece cierto preocupacionnan dilanti. El a declara cu nan tambe tin un rol hopi importante pa garantisa cu nan pashentnan ta haya informacion corecto.

“E rol cu nos ta fungi den esey ta pa conscientisa nos comunidad cu nan por haci test”, no solamente cu test di dede, sino cu tambe por haci cu test di sanger, el a sigura.

Benschop a manifesta cu, desde cuminsamento di e campaña te aworaki, nan a haya hopi bon feedback. E reaccion cu nan a haya for di laboratorio ta cu tin mas di 170 hende a bay haci test, di cual 140 tin probabilidad halto di desaroya cancer, y 30 a sali cu porcentahe menos halto pa desaroya e malesa y lo mester continua cu chekeo. Esey ta duna indicacion cu casi 17.6% den e comunidad cu a bay haci un test a sali halto, y a duna indicacion cu a logra e meta di e fundacion.

Tocante e personanan aki, el a declara cu nan tin cu sigui bay dokter, bay urologo pa sigui haci test mas avansa y wak kico ta nan situacion individual y con nan ta bay cana cu esaki.

Tocante e charla, Benschop a bisa cu esaki ta e clausura di e campaña pa e aña y cu november ta e luna di conscientisacion riba malesanan di hende homber.