Ayera tardi, Departamento di Salubridad Publico (DVG) a manda un comunicado di prensa den cual a informa comunidad cu un persona a viola su cuarentena obligatorio y a wordo gara pa Task Force.

Segun e comunicado, ta trata di musico cu ta lider di un banda conoci, kende a trata di burla di Aruba su maneho di prevencion na frontera. Ta asina cu na momento cu e la bolbe di su vakantie, e musico lider di banda a opta pa no haci e Covid test, pero a bay den cuarentena pa 14 dia.

Nan a splica cu e mesun anochi e musico aki mester a wordo saca for di un evento musical pa Task Force y cu refuerso di KPA, debi cu el a viola su cuarentena poniendo den riesgo di contagio cu Covid e propio miembronan di su banda musical y su fanaticonan. Despues di e incidente aki e musico kier a bay toca na un otro establecimento, pero corectamente a wordo nenga. Despues di tur esaki e musico a opta pa test toch mirando cu esaki lo por sak’e di e cuarentena obligatorio den cual e tabata haya su mes, debi cu e no kier a test na aeropuerto ora cu el a yega Aruba for di un pais di riesgo. Pa esaki e musico a solicita un test online.

“E tipo di comportacion aki ta hopi di lamenta, mirando cu autoridadnan di Aruba ta haci tur locual ta posibel pa minimalisa e riesgo di importacion di casonan, y ta algun propio yiu di tera ta trata na burla di e sistema”, e comunicado ta indica.

Di mesun manera, e musico na su yegada na Test Center na Hospital ayera a keda informa debidamente cu e tin cu paga pa e test aki y cu e tin cu warda su turno, debi cu tin hopi hende malo cu sintoma di Covid di berdad cu tin urgencia prome cune. DVG a señala cu e musico a rabia y kier exigi pa e pasa prome cu tur otro persona malo y cu tin cita, mirando cu ta paga e ta paga pa haci test.

Crisis Team ta manda pa medio di e comunicado aki un mensahe hopi cla pa comunidad cu na Aruba no ta importa ken e persona ta, e maneho di COVID-19 ta conta pa tur hende igual. Loke e musico aki a haci ta castigabel pa ley y no por descarta cu e lo haya hasta un boet pa su comportacion iresponsabel.

Influencia contra test

Den dianan aki, por a mira cu riba rednan social varios influencer y artista a cuminsa un campaña pa hende no haci test di Covid-19. Esaki pa motibo cu nan no kier pa Crisis Team implementa diferente medidanan di prevencion, por ehemplo toque de queda, pa via di aumento di casonan cu recientemente a bin registrando den ultimo dianan. E celebridadnan aki a comparti varios comentario riba nan rednan social cu ta bisa: “No bay test, meld AO y keda bo cas” y “Si bo ta test positivo y meld pa Covid na DVG, bo ta parti di e problema pakico Aruba ta subi red list. Keda cas, ziek uit”, “Boso ta sintiendo boso mes heroenan grandi para den rij pa haci test? Keda bo cas, stop di ta zeur ohm”.

Esaki ta ehemplo di algun di nan.

Search and destroy
 Relaciona cu esaki, Bon Dia Aruba a tuma contacto cu DVG pa nan duna nan banda di medaya. Jurette Croes, PR di e departamento aki a señala: “Como departamento encarga cu salud publico, ta nos deber hunto cu Crisis team pa fiha e miho maneho pa salvaguardia salud di nos comunidad. E maneho di test ora tin sintoma ta hiba e nomber ‘search and destroy’ dus busca e casonan, isola nan y di e forma aki destrui nan pa nan no sigui plama. Na momento cu un persona dicidi cu e no ta bay test pa e sa si ta Covid of no, esaki nota loke nos ta conseha. Ora un persona sa cu e ta positivo e lo ta mas consciente. Tambe tur cu ta rond di dje ta wordo buta den cuarentena di e forma aki minimalisando mas e contagio. Door di no test tur esunnan cu por a keda contagia rond di bo lo por sigui plama e virus sin sa”, Croes a expresa.

Tambe nan a indica cu si un persona ta positivo pa Covid-19 nan ta pidi pa tene cuenta cu lo siguiente: e persona mester isola su mes, no mester tin contacto cu ningun otro persona pa asina no contrae contagio; keda pendiente di telefon, DVG lo contact e persona pa asina haci un intake pa unda y cu ken e persona tabata den contacto cune den e ultimo dianan; prepara e informacion aki (lista di contacto) pa asina DVG tuma contacto pa por tin tur informacion na man di un miho manera; si e persona tabata den cercania di un persona sin tapaboca, menos di 1.5 meter y pa mas di 15 minuut por pone e persona aki riba lista di contacto.

Nan ta pidi pa tin pasenshi y cooperacion y pa tene na cuenta cu e reglanan aki, casonan di Covid-19 ta subiendo drasticamente atrobe, di cual ultimo dianan e ta entre 100 cu 150 caso positivo pa dia cu ta haci cu pa nan como DVG pa tuma contacto cu personanan positivo por tarda entre 1 pa 2 dia.