Tin sosten pa esnan cu mester yuda, pero tambe ta esencial pa duna y conta cu apoyo moral, sosten emocional di colega y comunidad. Esey ta e opinion di Maurits ‘Junior’ Rivero (43), Officier van Dienst na Departamento di Ambulance IMSAN, cu den e dianan aki tin sosten pa cu su coleganan, particularmente despues di e accidente traumatico na Seroe Colorado cu a laga causa conmocion pisa den comunidad. Y aunke hopi enfoca riba e victimanan, Junior y staff di IMSAN tabatin y tin e personal cu a acudi na e accidente den mente.

Junior Rivero tin 11 aña cu servicio di Ambulance, un division di IMSAN. Un enfermero cu for di hoben tabata sa cu un dia e lo traha cu Servicio di Ambulance. Semper e tabata sinti un afinidad pa duna asistencia. E hoben cu a lanta den Scouting na Aruba, a bira un boluntario pa e hala hubenil di Cruz Cora. Cu su 14 aña ya caba e tabata sa cu su interes ta den EMS, cual ta Emergency Medical Service. E siguiente paso tabata pa studia enfermeria pa despues specialisa na Hulanda. E transicion di Cruz Cora, pa enfermeria y despues Ambulance como tal tabata organico y no tabata un sorpresa pa Rivero. Kizas e ta splica tambe pakico varios di esnan cu ta traha na Servicio di Ambulance awendia tambe tabata personanan cu experiencia den trabao boluntario.

E trabao di enfermeria ta uno cu reto y pisa, pa no lubida, emocional. Pero un trahado di Ambulance no solamente ta un enfermero of un assistent. E trahado di Ambulance ta esun cu tin conhuntamente tuma decision. E gerente medico ta declara e enfermero y assistent di Ambulance competente y autorisa, basa riba e preparacion specialisa di e Ambulance Academie. “Abo ta tuma e decision pa duna un medicamento, pa transporta un persona of no, delibera cu e dokter di cas. Tin momento cu mester hasta tuma e decision pa stop e tratamento di e pacient. Ta decisionnan dificil, pasobra e trahado di Ambulance kier duna e maximo cu e tin.” Realidad di bida ta cu a pesar di duna e miho cuido, e medicamento corecto na e miho momento, haci e entubacion perfecto, toch e resultado no ta locual ta desea tur ora. “ Esey ta e parti mas dificil pa anda cu n’e. Bo tin e pensamento di kier scapa tur, y no tur ora esey por ta e caso.”

Aunke cu ta accidentenan ta yama mas atencion, Departamento di Ambulance di IMSAN ta brinda ayudo varia. Accidente ta menos di 25 porciento di tur e casonan, cu ta inclui atende persona cu problema di curazon, trauma, diabeticonan, ademas di personanan cu cancer y cu hopi biaha ta terminal.

Pero locual a nota, ta cu mas y mas den e comunidad geriatico, tin mas necesidad di atencion di servicio di Ambulance. No necesariamente pa emergencia fisico. Hopi ta neglisha y tin mester di atencion, tin biaha un simpel saludo. “Lamentablemente hopi biaha e hendenan aki mester di djis atencion.” Rivero a splica cu e ‘core business’ di servicio di Ambulance berdad ta cuido di emergencia, pero “e aspecto humanitario tambe tin un aspecto grandi den e trabao.”

COVID

Personal di Ambulance a pasa den un revolucion debi na COVID-19. “E tabata un situacion cu nos no tabata prepara p’e. Rond mundo no tabata sa kico tabata warda nos. E preparacion como tal a tuma mas largo y a ripara cu den cierto caso tabata tuma hasta demasiado precaucion.” E cambio sinembargo ta cu “a bin mas empatia pa e pacient y tambe cu e trahado di Ambulance mester ta mas prepara. Nos ta mas skerpi ora di acerca e pacient. Nos mester percura cu e muraya di proteccion ta firme y halto, pa na momento cu ta trata e pacient ta brinda e miho cuido pero tambe percura pa proteha e trahado di Ambulance.”

Seroe Colorado

Rivero tabata tin e ‘piket leiding’ di Ambulance e prome diadomingo di October y tabata na cabez di e team cu a acudi na e accidente fatal cu a laga asina hopi victima atras. “Ta trata di un team relativamente hoben, pero uno hopi dinamico cu a mustra profesionalismo durante e momentonan ey. Mi ta inmensamente orguyoso di e team, di cada un di nan cu a brinda e miho di nan mes.”

Sinembargo no mester lubida cu ta trata di hende, cu cada dia mester enfrenta y biba cu experiencia. “E ta bay keda hopi tempo cu nan. E lo no ta algo facil. Pero, nos tin e apoyo pa nan.”

Ambulans tin un BOT team, un Bedrijfsopvang Team unda cada colega incluyendo Officier van Dienst manera Junior ta haci e prome acercamento, ta controla y puntra e trahadonan con nan ta bayendo. Tambe ta comunica cu Recurso Humano pa hunto cu Gerencia ta percura pa ayudo profesional, psicologico si tin mester. Rivero ta contento con IMSAN a percura pa e sosten aki, cu no ta solamente pa personal di Ambulance pero henter e personal di e instituto.

Rivero ta comparti kico e mes a siña den enfrenta situacion traumatico, cu su coleganan. “Mester papia di e caso. Ta importante pa corda cu tin famia na cas. Algun di nos tin yiu. Y no por imagina cu ta hiba e peso ey na cas, pasobra e no ta husto pa e famia. Pero e famia ta un sosten grandi pasobra nan sa kico abo como trahado di Ambulance ta pasa den dje. Mester papia, expresa, skirbi bo pensamentonan. Pero alabes ta importante pa distrae mente, haci ehercicio, pa anda cu e emocionnan pisa aki.” Rivero a bisa cu mester actua mesora pa evita cu ta cay den un spiraal.

“E ‘tipping point’ pa cay den e spiraal negativo ta hopi chikito. Mi a experiencia esaki cu coleganan, tempo cu mi tabata traha pafo di Aruba, cu na momento cu a cay den e spiraal negativo, no a logra sali di dje. Y esey ta jammer pasobra ta trata di profesionalnan cu un conocemento asina grandi, pero dor cu no a logra enfrenta e trauma, a bandona e trabao. Esey ta locual nos di IMSAN ta purba di evita. E team di Ambulance ta relativamente jong, nan tin hopi aña pa bay ainda. Nos kier pa nan keda mas cu nos.”

Pues, famia, amigo y comunidad en general por yuda door di simplemente ta un sosten na e trahadonan, scucha nan (aunke cu e por zona repetitivo) y sigur door di duna nan espacio di traha, ta e mensahe di Junior Rivero.