Cu asombro mi persona por a tuma nota di un declaracion humiliante di presidente di Parlamento di Aruba un poco tempo pasa, esta Sr. Edgard Vrolijk den direccion di pensionadonan ora cu a haci e pregunta ki dia parlamento por reuni cu pensionadonan encuanto e situacion alarmante di tur e medidanan cu su Gobierno tin den pipeline pa masacra nos pueblo cune.
Cu un arogancia repugnante e Presidente di parlamento a declara cu nos pensionadonan tin di warda te aña 2025 pa nan por wordo scucha pa parlamento o lo por haya un invitacion.
Un insulto condenabel mes den direccion di esunnan cu danki na nan esfuerso durante añanan di trabou duro y kendenan a construi e fundeshi di e progreso di nos pais Aruba, pa awe un gobierno mediocre cu ta wordo sosteni pa algun marioneta den parlamento, ta masacrando tur locual wordo construi y logra pa e Gobierno inepto y incapaz actualmente.
Nos pensionadonan merece mas respet pa e organo mas halto di nos pais, cual ta parlamento, pero e asunto di menosprecio pa pensionadonan door di partido MEP, no ta un secreto publico.
Ta como si fuera dicho menosprecio y burla pa nos hendenan grandi ta forma parti di e DNA di partido MEP y cu ta core den nan benanan pa no duna balor y atencion na nos pensionadonan.
Mester refresca memoria di esunnan actual den MEP of e marionetanan den parlamento cu ta sostene e gobierno di sinberguensa aki, con nan lider honorario, esta Nel Oduber y MEP den pasado semper tawata contra di e redoblacion di e AOV pa nos hendenan grandi, esta e asina yama pension di biehes.
A bisa e tempo ey cu ta imposibel pa haci esaki y na unda e lider di AVP e tempo ey den persona di sr.mr. Henny Eman a puntra Nel den un debate transmiti na television, si su persona lo por biba cu 375 florin pa luna.
Danki na pueblo cu a scucha e mensahe e tempo ey a duna partido AVP mandato y asina e gobierno di signatura di AVP bao liderazgo di sr. mr. Henny Eman a cumpli cu e promesa haci na nos pensionadonan y hendenan grandi durante campaña cu nan pensioen lo wordo redobla. AVP no ta un partido cu ta grita of basa su mes cu promesanan di campaña ta un cos, gobernacion ta otro cos pero pa partido MEP e frase aki tin su validez ya cu esakinan ta propio palabranan expresa pa Nel himself.
Actualmente cu tur e masacre di medidanan cu e gobierno di MEP/POR/RED y esun actual MEP/RAIZ a bin ta tumando desde fin di 2017 , ya pueblo no por soporta mas, corda nos pensionadonan.
Referiendo na e insulto di e Presidente di Parlamento den direccion di nos pensionadonan, ta parce cu e persona aki no tin famia cu ta pensionado y ta haci mofa of cherche cu lo reuni cu nos pensionadonan na aña 2025 pero nos pensionadonan tin cu keda den miseria numa, pasobra Edgard Vrolijk so mag di biba den luho cu placa di pueblo y un persona cu mes ta presidente estilo presidente dictatorial estilo Maduro naVenezuela, unda poder ta a susha su cabes, keriendo cu ta un poder cu lo keda pa semper.
Sea humilde Edgard y stop bo abuso contra nos pueblo, specialmente contra nos pensionadonan.
Preocupacion y incertidumbre cu ta bibando den nos pueblo cu tur e medidanan cu e sinberguensa di e gobernantenan ta bin ta imponiendo riba nos pueblo, a yega ora pa e pueblo lanta para y bisa ta basta na e gobernacion di mas caotico, malo y ineficiente cu Aruba a yega di experencia y cu keto bay no ta abusa di nos pensionadonan,” Juni Croes di partido AVP a trece dilanti.
