Julio Borges ta nenga invitacion di Maduro pa yega Palacio Miraflores

E presidente di Asamblea Nacional, Julio Borges, a nenga un invitacion di e hefe di estado, presidente Nicolás Maduro, pa continua e dialogo na Miraflores.

“Lag’e invita na Miraflores e famianan Venezolano cu ta sufri di hamber y di escasez di medicina, cu su modelo a genera. Nos lo bay ora nos recupera democracia den eleccion presidencial di 2018. Nos interes no ta atende su invitacionnan, sino logra un acuerdo unda ta mustra un ruta di futuro pa Venezuela, cu ta inclui cuminda, medicina y voto liber,” e parlamentario a señala riba cuenta di Twitter. Borges a sigura cu Maduro ta ataca su persona pasobra e ta sinti temor pa e inicio di un negociacion serio, cu aval internacional.

E Comision Asesor di MUD na Republica Dominicana a boga pa continuacion di e dialogo. “Nos ta reivindica e proceso di negociacion y nos conoce su complehidad. Ainda no a yega na acuerdo firme. Nos ta den emergencia y nos ta haci un yamado pa e trabao continua sin retraso, sin obstruccion y sin perde e urgencia di vista,” e asesornan cu ta procedente di sociedad civil, a declara.

Nan a responsabilisa gobierno pa e crisis. “E culpable di e tragedia humanitario y di e miseria ta e modelo economico fracasa cu gobierno kier a impone. El a caba cu inversion priva, empleo digno, educacion y salud.”

Nicolas Maduro cu criptomoneda Venezolano

Mientras tanto, presidente Maduro a declara diadomingo pasa, cu su gobierno lo introduci un variante propio di un moneda digital, cu lo hiba e nomber ‘Petro’, cu referencia na e reservanan grandi di petroleo di e pais, cu aparentemente mester sirbi di apoyo na e moneda nobo, como tambe e recursonan di gas, oro y diamante. Segun e presidente, e moneda lo facilita e ciudadano Venezolano pa haci transaccion financiero y asina evadi e obstaculonan cu e sancionnan Mericano ta impone.

E economista Henkel García, director di Econométrica, a expresa inseguridad acerca di e funcionamento di e sistema di criptomoneda cu presidente Nicolás Maduro a anuncia como alternativa  di financiamento. 

“E monedanan lo cumpli cu nan funcion di placa (unidad contable, medio di intercambio y reserva di valor) segun cu hende por confia den nan. E confiansa den moneda ta pasa via e confiansa den su gobierno, den su sistema economico. Venezuela ta carece di ambos. E criptomonedanan no ta scapa di e dinamica ey,” García ta analisa.