Den e presupuesto complementario cu a ser aproba den dianan aki na Parlamento di Aruba, minister di Enseñansa y Deporte a informa cu a stipula 6.7 miyon florin pa construi un edificio completamente nobo pa Juliana School.

Dialuna ultimo, Minister di Enseñansa y Deporte Endy Croes a anuncia den Parlamento di Aruba cu Paradera lo haya un scol secundario. Ta trata di Juliana School, cual a stipula 6.7 miyon florin pa construi un edificio completamente nobo.

Manera ta conoci, Juliana School no tabata den bon condicion y bou di maneho di otro gobierno e scol a cera na aña 2016.

E team di Juliana School mester a muda den un otro edificio cu no ta apropia pa e alumnonan haya les. Minister Endy Croes a indica cu desde aña pasa a traha un plan pa e proyecto di construccion di Juliana School, pero tabata sperando e fondonan necesario.

Durante e reunion di presupuesto complementario 2023, minister Endy Croes a indica cu danki na e surplus a haya e fondo necesario pa construi Juliana School y lo inicia cu e proyecto di construccion durante e prome lunanan di aña 2024.

Minister Croes a reuni cu e staf di Juliana School pa involucra nan den e proyecto y trece nan peticionnan dilanti, durante e reunion Juliana School a opta pa haya un scol completamente innovativo y di e forma aki a diseña e scol y cu esaki ta cumpliendo cu recomendacion 3 di Doorlichting van het Arubaanse Onderwijsbestel, cual ta indica cu mester tin un insfrastructura adecua pa nos enseñansa.

Tabata october di aña 2016 cu Juliana Mavo School a cuminsa cu les na un localidad nobo e debi cu manera ya caba tabata conoci, e edificio na George Madurostraat tabata den hopi mal estado y mester di renobacion urgente.

Por a mira cu riba rednan social tabatin cierto reaccion di diferente usuario cuestionando kico ta bay pasa awor cu ex-edificio cu a keda bandona na Playa, pakico no a inverti tur e placa ey den edificio aki? tabata un di e preguntanan.

Tambe ta bon pa trece dilanti cu cifranan di natalidad na Aruba ta disminuyendo cu e paso di añanan, hende grandi cu mester di un cas di cuido tambe ta un otro punto importante ya cu SABA na San Nicolas ta bay cera segun informacion cu a yega na nos mesa di redaccion, tambe por ta un opcion den futuro si por renoba e ex-edificio di Juliana School y converti esey den un cas di cuido.

Potret ta cortesia di usuario di Facebook.