Juliana Mavo School lo cera su porta. E scol ta den hopi mal estado. Tambe tin tegel di asbest kibra den un lokaal unda alumnonan pa añanan a haya les den e situacion ey.
Pa e docente di Wiskunde, Jennifer Maduro, trahando 6 aña na e scol, e situacion a bira asina pio cu el a dicidi di stop di duna les den su lokaal 4. Esaki despues cu trahadonan di DOW a bin bishita y a bisa sra. Maduro cu su lokaal, y tambe un otro y e gymzaal ta afgekeurd.
E mes a a bay wak bou di su lokaal tambe y a ripara cu diferente pilar cu ta carga e edificio ta kibra. Nan ta asina kibra (por mira riba e potretnan) cu e hero a sali. Ademas por mira den e lokaal 4 mes, unda e bentananan no por habri y mayoria ta cera cu palo, cu tin un vloer di asbest unda tin diferente parti kibra. Net patras unda sra. Maduro mes semper tabata sinta pa duna les, nos por mira un buraco grandi den e tegel.
Sra. Maduro a informa directiva di e situacion y tambe di locual e trahadonan di DOW a bisa. Segun e, directiva a confirma cu e lokaalnan menciona ta afgekeurd.
E docente ta bisa cu e directiva su contesta tabata cu nan tin comprension pa su preocupacion y decision di no duna lesa mas den su lokaal. Pero nan a indica cu nan no por haci algo. Sra. Maduro a dicidi di manda minister di Enseñansa un carta tambe pa asina e ta ‘oficial riba preto cu blanco’ dicon e no kier duna les mas den su lokaal.
Despues di mas o menos 2 siman diripiente e scol a wordo informa cu lo bay renoba e edificionnan y temporalmente lo muda pa Britannia.
No ta conoci si e scol a pone e alumnonan y mayornan na haltura di e situacion. Tampoco Bon Dia Aruba a logra di haya informacion di e directiva di Juliana School, ni di Dienst Publieke Scholen como cu e scol ta cay bou gobierno.
