Juffrouw Miertje: “Vacuna pa bo salud ta na prome luga, salud di bo famia y salud di henter un pais”

Desde cu programa di vacunacion a cuminsa na Aruba dia 17 di februari cu e prome ‘batch’ di 11.700 dosis di e compania Mericano Pfizer, ya caba tin casi 8.000 persona cu a vacuna.

Bon Dia Aruba a tuma contacto cu Emira Rodriguez-Tromp, conoci cariñosamente como “Juffrouw Miertje”, ken tabata un di e prome persona cu a haya e vacuna ora e programa di inmunisacion a cuminsa.

Juffrouw Miertje ta un maestro di scol di 65 aña cu ta hopi conoci na Aruba pa su entrega y dedicacion na su trabou y cu awor a baha cu pension, dos siman pasa el a mustra su curashi ora el a haya sa cu e tabata forma parti di e prome grupo di personanan cu lo tuma e vacuna na Don Bosco hunto cu otro personanan conoci den comunidad y personal na e prome linea.

El a conta cu ora el a vacuna e tabata hopi ‘proud’ di ta un di e prome personanan cu a haya e dosis, tambe el a bisa cu na comienso e plan tabata pa acompaña su yiu muhe cu tambe tabata den e grupo aki pa haya e hangua y asina duna su apoyo p’e, despues e circunstancia a cambia pa motibo cu el a haya e chens di por wordo vacuna e mesun dia.

“Mi no tabata forma parti di e prome grupo, ma keda pafo wardando mi yiu y despues ma wordo informa door di un persona di DVG cu mi por drenta y haya e vacuna pasobra tabatin un luga pa mi”, el a sigura.

Asina mes, el a declara cu mentalmente e no tabata prepara pa esey, ora comunidad por a mira riba diferente medionan di comunicacion juffrouw Miertje a mustra un tiki nervioso, pa cu esaki, el a señala cu esey si ta berdad pa motibo cu desde chikito ora e semper tabata haya un hangua e tabata bira nervioso.

“Semper ora mi curpa tabata haya un hangua, e ta dolor y na e momento ey mi tabatin hopi nervio y mi no sa kico por a espera, mentalmente mi no tabata cla tampoco pero ma bisa mi mes, mi ta bay p’e”, juffrouw Miertje.

Tambe el a bisa cu el a haya un chens hopi importante y pa e motibo ey el a probecha, ora el a habri su wowo e personal di DVG a pone un pleister riba su brasa caba, pa loke el a manifesta cu e no a sinti nada.

Despues di e vacunacion, mester monitoria tur persona pa wak si algun di nan a haya efecto secundario, el a comenta cu e prome dos dia unico cos cu el a sinti ta cu tabatin dolor na su brasa, e tabata stijf ora hisa su brasa pero despues e dolor a bay y e no a sinti nada mas.

“Mi no a sinti ni un side effect, ni un dolor di cabes, ma pasa bon den e proceso di vacuna”, el a sigura.

Pa finalisa, juffrouw Miertje a agrega un mensahe pa esunnan cu te ainda no ta sinti prepara pa tuma e vacuna na unda el a expresa cu esey ta keda di parti di cada persona, “pero si abo kier pa bo salud, ta na prome luga, salud di bo famia y salud di full un pais, vacuna pa bo curpa haya anticuerpo pa e ora ey si bo haya e virus mes bo por enfrenta e malesa aki”.

Ademas, Bon Dia Aruba a tuma contacto cu Departamento di Salud Publico DVG e cual a informa cu te dia 2 di maart ultimo 7.857 persona a wordo vacuna pa loke ta trata e prome grupo aki, tampoco nan no a registra ni un caso pa loke ta trata efectonan secundario, solamente algun a registra dolor na e luga unda a inyecta e vacuna, e man poco stijf y keintura pa 1 dia.

Bijwerkingen Centrum Lareb cu Pharmacovigilance Centre Lareb a publica un rapport semanal riba efectonan secundario te dia 28 di februari na Hulanda, e rapport aki ta referi cu aproximadamente 1.1 miyon vacuna a wordo administra.

Di loke ta trata e number di rapport di efectonan secundario, nan a informa cu tin 6.426 rapport cu 31.534 efecto secundario sospechoso, di e cual 5.799 cu a haya e vacuna di Pfizer y BioNTech. 386 rapport di vacuna Moderna y 159 di AstraZeneca.

E mayoria di nan a registra dolor muscular, dolor di cabes, malestar, fatiga, calafriu, sacamento y kentura, esaki ta sintomanan leve cu ta disparce dianan despues, pero tambe nan a bisa cu te ainda nan ta sigui investiga riba esaki.

Na 39 rapport tabatin keho riba un reaccion alergico hopi grave, 37 di nan a haya e vacuna di Pfizer y BioNTech. E prome sintoma di reaccion alergico grave e mayoria di biaha ta cuminsa den e prome 15 pa 30 minuut despues cu a wordo vacuna, tur e pashent a haya tratamento y nan a recupera di manera lihe y adecua, e tipo di reaccion alergico grave no ta algo comun pero nan ta afirma cu si por pasa.

Te 28 di februari, a reporta 87 morto despues di e vacunacion y ta trata di personanan mayor di 80 aña, tur di nan tabatin un salud fragil debi na otro problemanan di salud ya sea grave o pa nan mesun edad, nan a fayece entre e prome dia y e dia 26 despues di e vacunacion.

Ta importante pa trece dilanti cu tin personanan cu ta sinti desconfiansa pa e vacuna na Aruba y na otro paisnan pa algun of otro motibo, por ehemplo esey ta e caso di e principal sindicato di maestro na Italia cu ta rechasa e vacuna di AstraZeneca pa via cu nan ta kere cu esun cu a wordo produci pa Pfizer y Moderna ta mas efectivo.

E rechaso aki tambe por wordo mira na varios sector di e poblacion na Europa na unda cu autoridadnan di Noruega, Dinamarca, Islandia, Hulanda, Francia, Alemania y Belgica entre otronan, a informa cu no lo aplica e vacuna ey na personanan mayor di 65 aña pa considera cu te ainda nan no tin datonan suficiente riba su efectividad.

Asina mes, ta existi cierto duda pa loke ta trata e vacuna Chines of Ruso tanto entre dokternan como entre comunidad, aunke e efectividad di Sputnik V di Rusia ta parce algo bon y resultadonan di CoronaVac di Sinovac esun Chines ainda no a wordo publica, loke ta circula entre gremio medico tambe ta bisa cu nan ta prometedor.