Juffrouw Jeanira Wernet, bailarina y docente di CKV cu meta pa inspira hobennan a traves di arte y educacion

Maestronan ta un di e pilarnan clave pa educacion di nos muchanan. Arte y cultura ta un di e pilarnan cu ta sostene e identidad di nos pais. E combinacion di ambos ta locual a inspira Jeanira Wernet, un docente di Culturele en Kunstzinnige Vorming (CKV) na Scol Practico pa Ofishi (SPO) na Santa Cruz, drenta den e mundo di enseñansa pa trece pa dilanti mas di arte y cultura di Aruba na scol.

Wernet tin seis aña eherciendo e trabao di maestro di CKV y desde su nuebe aña e ta activo den e mundo di baile. E ta conta cu e motibo principal pakico el a dicidi pa bira docente di CKV ta pasobra “cultura na Aruba, nos ta papia hopi di dje, pero ta pober”.

E ta splica cu educacion, na scol ta na unda e muchanan ta siña hopi cos. Y e ta bisa cu mucha desde chikito mester siña cu e materia di arte y cultura no ta keda solamente como un hobby, sino ta algo cu tur hende ta lanta cune. “Pero lastimamente e no ta full completo na Aruba, lastimamente arte y cultura nan ta hay’e un parti cu no ta hopi importante. Pero nos ta hay’e importante dus e ora nos ta purba di duna un tiki di tur cos na scol”, el a splica.

Wernet ta traha den educacion special y e ta conta cu su dinamica den klas ta revolve alrededor di hopi combersacion y harimento. “Den klas nos ta hari hopi,” el a bisa. “Mi ta den educacion special dus bo mester wak bon con bo ta papia cu nan pa nan por compronde kico bo ta purbando di siña nan. Pero nos ta hiba mas un combersacion, mi ta splica y tanten cu e mucha no compronde mi ta keda splica, of mi ta cuminsa haci ehempel di tur cos cu mi haya cu por ta posibel. Mi ta trece como ehempel pa nan por compronde. Banda di siña, combersa, pasobra door di combersacion nos ta siña mas y ya e ora bo ta yuda nan genera un opinion di nan mes.”

Su amor pa baile y su experencia den e mundo di baile ta locual a inspirele pa bay den e direccion di docente di CKV. E ta splica cu semper e tabatin e pensamento cu su don, pakico no trece esaki cerca otro, pa yuda otro mucha desaroya nan don tambe. “No ta tur mayor tin e placa pa pone nan yiu den un scol di baile, of curso di pintamento, of les di musica. Y nos na scol tin e oportunidad pa trece dilanti pa e mucha haya e posibilidadnan ey tambe, pa e crece den e parti ey”, el a bisa.

“Full e intencion ta pa yuda e mucha of hoben, saca su emocionnan usando e diferente tiponan di arte cu nos conoce. Duna un granito pa e siña cu e no mester bay den bringamento of gang, si e usa arte e por saca tur su frustracion. Yy despues e ta bira un pasion tambe, pasobra bo ta gusta locual cu bo ta haci”, el a agrega.

“Pa cultura por prevalece, pa cultura por ta den curason di tur hende, no ta solamente scol pero nos tin cu cuminsa di ariba, di na halto”, el a expresa. E ta splica cu esey e kiermen cu e hende cu tin e poder mester cambia e sistema educativo y nan mester duna e stap pa cambiele pa e docentenan por haciele. E ta indica cu aunke cultura ta incorpora den e sistema educativo, e no ta wordo balora y e no ta ehecuta manera mester ta, pasobra e no ta hinca den otro di un manera structural. “Si no bo ta keda mara na locual cu nos mester siña nos no ta bay yega na e meta nunca. Nos horta shot, den otro palabra, pa nos por duna un tiki”, el a agrega.

Por ultimo, Wernet su mensahe pa tur mucha, hoben ta; “nunca keda sin soña. Soña semper y traha pa bo yega na bo soño. Eyfo semper tin un docente cu bo lo haya great pa papia cune of bo lo haya un docente cu ta wak algo den bo. Y pa bo e por ta streng, pero pa e docente esey ta e manera pa purba saca lo mas cu e por di bo. Y no laga nunca niun hende bisa bo cu bo no por, pasobra tur cos den bida bo por. Ta abo mester duna di bo parti pa por logra.”