Debra Boekhoudt, miho conoci como Juf. Debra pa hopi hende, tin hopi aña trahando como docente di scol y di baile. Su amor pa mucha y pa yuda hende ta dun’e e empuhe pa sigui eherce su profesion cu dedicacion y disciplina y asina yuda e mucha- y hobennan di Aruba cu nan desaroyo personal y social.

Den un entrevista pa Bon Dia Aruba, Debra ta conta cu na principio el a bay Hulanda y a studia trabao social, y ora cu el a yega Aruba el a traha durante 7 aña na Departamento di Asuntonan Social. E ta un persona cu semper a gusta yuda hende y despues la haya oportunidad pa bay IPA pa studia pa docente di scol basico.

El a sigui conta cu durante 15 aña el a traha na un scol pa muchanan special y durante e añanan cu el a traha na e scol pa muchanan special, su amor pa e grupo special a crece inmensamente, te cu el a dicidi di busca su masters den Educacion Special.

Despues cu el a termina su masters, Juf. Debra a dicidi pa cuminsa traha na un scol secundario y el a cuminsa traha como docente na Scol Practico pa Ofishi (SPO) na Santa Cruz. SPO ta un scol practico unda e hobennan ta prepara nan mes pa drenta tereno laboral, y actualmente esaki ta su di 5 aña trahando na SPO Santa Cruz como docente y como consehero di scol.

“Mi escogencia pa ta juffrouw di scol ta di chikito, mi tabata sa caba kico mi kier a bira. Tur ora mi tabata hunga cu mi ta un juffrouw di scol”, el a bisa.

Actualmente Juf. Debra ta duna e materia Hulandes, matematica, comercio y administracion, y formacion personal. Como consehero di e scol e ta conseha e hobennan ora cu ta necesario y e ta forma parti di e ekipo di cuidado (zorg team) di e scol tambe.

“E ta un trabao cu bo mester tin amor p’e, amor pa bo studiantenan y amor pa bo trabao”, el a bisa. E ta splica cu ta hopi importante, na momento cu un docente yega mainta, pa mustra e klas alegria, aunke porta como docente bo no a drumi of descansa bon. El a sigui splica cu ta importante tambe pa papia y conta nan con a bay cu bo mes, laga e alumnonan sinti e confiansa den bo como nan maestro.

“E otro parti hopi importante ta structura consecuente y maneho di bo klas. Esaki ta encera diferente aspecto, por ehempel, regla, instruccion, contenido di bo les, metodo, ambiente den klas, relacion cu bo alumnonan etcetera. Un docente cu tin esakinan na ordo ta e docente mas feliz”, el a agrega.

Aparte di ta un docente di scol, Juf. Debra ta un juffrouw di baile y ta directora di e grupo di baile conoci na Aruba, Kids & Youth in Action. E ta conta cu durante su estudio na Hulanda e tabata forma parti di un agencia di modelahe y e tabata modela hopi paña di bruid. Ora el a regresa Aruba el a cuminsa cu un grupo di modelahe pa mucha y despues e grupo a cuminsa baila cancionnan moderno y aki aya folklore. El a forma su grupo di carnaval, Kids In Action pa 5 aña y durante e cinco aña e tabatin hopi exito cu e grupo di carnaval. E grupo a gana premionan di grupo luhoso, grupo di aña y tur su reinanan a logra e titulo maximo of finalista.

Na momento cu el a dicidi di bay IPA el stop di dedica hopi tempo na e grupo, pero despues di un tempo e grupo Kids in Action a bira Kids & Youth In Action, un grupo cu ta baila folklore y musica moderno na diferente actividadnan na Aruba. “E grupo ta existi 29 aña y su meta ta pa hobennan ocupa nan mes cu actividadnan, educativo, social y productivo pa asina nan futuro ta ehemplar den nos comunidad. Atrobe amor y dedicacion a pone cu mi tin casi 30 aña cu e grupo. Keto bay mi tin goso cu e grupo”, el a finalisa.