E cantidad di hende cu ta haci uzo di alcohol of droga ta subi, pero e cifra di aña pasa te cu e fecha di awe ainda no tin esaki. Fundacion Anti Droga Aruba (FADA) mester haci un estudio ainda pa asina por haci un comparacion cu e aña anterior.
Cifranan di aña pasa
Actualmente FADA no tin cifranan di aña pasa di cuanto hende hoben y adulto a haci uzo di droga y alcohol. Segun Sr. Juendel Sprock, director di FADA, nan tin cu bay haci un biaha mas estudionan riba esaki. Nan lo mester haci estudio cu instancianan cu ta percura haci estudio. Loke cu fada sa ta cu e cifranan a keda casi mescos pa e uzo di alcohol den trafico.
FADA ta mira den prensa cu esaki ta hopi. Tur fin di siman tin algo. P’esey mes FADA hunto cu “Veiligheid verkeer” cu ta fundacion Zinnia, Departamento di Salud, Ministerio Publico y polis, a bin cu un campaña basta grandi manera esun di Hulanda, esta BOB. Nan a bin cu e version Arubano. FADA ta bay mira pa nan tur hunto combati e fenomeno di core bou influencia di alcohol.
Adicto ambulante
A puntra e director di FADA si nan tin un bista riba e grupo di adicto ambulante y si e cantidad a subi, baha of keda mescos. El a indica na Bon Dia Aruba, cu por mira cu e grupo a bira mas. Pero tin biaha no tin suficiente luga den e centronan pa adictonan ambulante. “Pero mi sa si. Mi a compronde cu gobierno ta trahando riba esey pa asina por alivia e situacion akinan,” el a bisa Bon Dia Aruba. “Pero ya, semper e ta un fenomeno cu ta subi y baha. Tin un tempo cu bo ta haya hopi y un tempo bo ta haya menos.”
E director sa cu gobierno ta trahando riba e situacion pa asina por calma esaki. Pa e motibo ey prevencion ta hopi importante pa menos hende cay den e bicio di alcohol pero tambe droga.
Comunidad mas consciente
FADA ta mira con comunidad ta aceptando tur loke nan ta haci pa preveni cu e droga yega na cierto caminda. A puntra Sr. Sprock si nan ta mira e comunidad ta reacciona positivo riba e campañanan cu ta wordo haci pa preveni e uzo di alcohol of droga. “Sigur cu si. Specialmente den e ultimo tempo nos ta mirando cu hotelnan ta buscando nos. Pasobra hopi biaha ta dificil pa e hendenan cu ta traha na hotel por yega na nos,” el a indica na Bon Dia Aruba. FADA ta percura pa bay cerca nan. FADA ta mira cu hendenan di hotel ta puntra pa e fundacion y ta pidi pa informacion, pasobra nan yiunan ta yega den contacto na scol cu droga of cu amigonan cu ta haci uzo di droga. Tambe nan ta ricibi hopi yamada for di scolnan pa asina nan duna informacion na e muchanan. “Sigur, sigur e ta algo cu pueblo ta mira cu mester. Nos di FADA ta purba di trece na un manera semper mas atractivo.”
