Siman pasa a tuma luga simposio di salud mental. E actividad tabata pa duna informacion y vision di ministerio di salud pa locual ta trata salud mental na Aruba, unda cu lo bin un plan integral pa tur area di problema mental.
Judesca Briceño, kende a duna e presentacion di salud mental y plan integral na cada departamento cu ta trata cu dicho problema, a duna di conoce cu ainda no tin un cifra conoci di e problema cu tin actualmente.
Sinembargo el a bisa cu cada aña e edad di persona cu ta confronta problema cu salud mental ta disminuyendo. E por bisa si cu e Fact-Team cu a introduci na september ta trahando den e parti di alcohol, droga y gaming, cu ta birando un problema grandi den comunidad y tin cu pone atencion pa traha di forma preventivo.
Briceño ta splica cu mester bin cu plan dirigi, cu enfoke di prevencion, y detecta e problema for di trempan. Manera ora nan ta ripara cu e comportacion di e mucha no ta adecua, ta e momento cu mester cuminsa tuma accion.
“Nos no lo bay wak e mucha riba su mes, pero tuma contacto cu e famia, esunnan cu ta rond di e mucha, pa por mira den ki situacion e mucha ta biba, su ambiente, con e ta creciendo. Di e forma aki por indica e problema prome e bira mas grandi”, el a splica.
Segun Briceño a cuminsa na september cu e fondo di crisis plan social pa e Fact-Team pa cuido di mucha y hoben ambulante. Ta trahando pa yega na e miho forma, mirando cu mucha entre 0–14 aña, no por mara nan na un tratamento.
Na momento cu logra tin dato pa esaki nan lo pone mas atencion y haci investigacion pa uzo di substancia. Cu e programa cu a introduci pa tur mucha di 5e klas, ‘Be Smart’ por haya e programa cu ta conscientisa tocante riesgo di adicion.
E parti di adicion tambe ta conta como un problema di salud mental y ta trahando hunto pa por duna e cliente cu ta enfrenta cu problema e cuido necesario cu e merece.
