Presidente dI Colombia, Juan Manuel Santos a firma un decreto, caminda ta duna e beneficio di amnistia na 3.252 miembro di FARC. Cu e decreto aki tin mas di 7.400 gueriyero cu nan situacion huridico soluciona caba.

“Esaki ta e di tres decreto di aplicacion di amnistia ‘de jure’ (pa ley ),” ministerio di husticia a splica den un comunicado.  Autoridad a bisa cu e beneficio di amnistia, ta duna na esunnan cu tin delito politico y otro delito relaciona manera: uso ilegal di arma di candela, uniforme militar, sedicion (esunnan cu ta den protesta y contra cumplimento di ley) y ‘asonada’ (esnan cu ta haci desorden y disturbio violento, cu alteracion di orden publico).

Decreto di amnistia a keda estableci den e acuerdo di paz, cu gobierno y FARC a firma dia 24 di november di aña pasa y cu a haya vigencia den un ley cu a keda aproba pa Congreso, dia 20 di december. Amnistia lo por ser otorga pa via hudicial, pa un hues ordinario y pa via administrativo, pa e presidente.

Segun ministerio di husticia a splica, gobierno a duna amnistia administrativo, via decreto pa 6.005 integrante di FARC, mientras cu pa via hudicial a sali mas di 1.400 gueriyero for di prizon, y cu den algun caso nan a haya e beneficio di libertad condicional, cu ta estableci den e ley di amnistia, y indulto tambe. Awor combatientenan ta prepara nan mes pa e inicio di nan proceso di incorporacion den sociedad”.

Ministerio a bisa cu dia 27 di juni FARC a duna tur nan arma na delegacion di ONU y dos siman despues como 95% di gueriyero cu ta conforma e organisacion aki, a finalisa cu nan “proceso di transito pa legalidad, bao e compromiso di participa den sistema integral di berdad, husticia, reparacion y no ripiticion.”  Pa completa e proceso tur ex- gueriyero cu a haya e beneficio aki, mester keda identifica como integrante di FARC, laga nan arma di candela personal cu un persona certifica di banda di ONU, firma un acta di compromiso di no tuma arma nunca mas, y finalmente haci un acreditacion na Oficina di Alto Comisiona di Paz. Segun gobierno, Forsa arma revolucionario di Colombia (Farc) tin mas di 12 mil miembro.

Awor tin concentra como 7 mil ex-combatiente, mas di 2600 ta colaborador y otro 3100 cu ta sinta condena den prizon.