Pandemia di coronavirus ta un cu a cambia tur cos na henter mundo. Un di nan ta trabou, pa via di pandemia hopi hende a keda sin haya pan riba mesa; pero esey no ta nifica cu hende a keda sin speransa of sin gana di haci algo pa bay dilanti.

Asina a demostra famia Kelly. Juan Manuel cu ta forma parti di dje a ofrece algun minuut di su tempo pa Bon Dia Aruba y a comparti cu nos su experiencia y di su famia, con na e momentonan aki nan ta dedica su tempo pa bende fruta y berdura di un manera accesibel pa comunidad y cu e fin di yuda otronan na e momentonan dificil aki di coronavirus.

Drive Thru Fruit Store ta un idea cu a cuminsa primeramente pa bende mango, door cu nan tin matanan na cas. Despues nan a pensa riba haci un fruteria, pa via cu e hunto cu su rumannan y mayornan a perde nan trabou den sector turistico.

Na medida cu e negoshi a cuminsa haya su forma, a bin idea di haci’e via un drive thru, unda e hendenan por bay te su cas na zona di Ayo pa busca e frutanan y berduranan cerca nan y sigui nan caminda. Di e manera aki hende no mester baha for di auto, no mester para den rij y tampoco perde nan tempo.

Kelly a comenta cu nan a haci tur e proceso na Camara di Comercio pa tene tur nan papel regla. A busca proveedonan y hunto cu un di nan por trece container tur siman for di Colombia, Merca,Costa Rica y Hulanda. “E mision ta pa yuda e comunidad den momentonan dificil”, Kelly a informa.

Pa via cu e prijsnan ta subi y e costo di bida a bira mas caro, Kelly a bisa cu fundacionnan, departamentonan di gobierno y otro entrepreneur a acerca nan y e proyecto a bira masha grandi cu un drive thru. Di mesun manera el a menciona cu nan a crea un producto cu e frutanan y cu esey a causa un impacto riba rednan social.

Kelly tambe a trece dilanti cu ‘nos ta ricibiendo clientenan for di varios districto di Aruba, te un pareha di pensionado a bin for di Palomarga’. Tambe a cuminsa haya pregunta si e proyecto aki ta algo pa e crisis so, pa loke el a contesta cu no, esaki ta algo di tur dia. “Nos ta haci nos best pa tur dia tin frutanan fresco.” E proveedonan ta colabora cu nan pa nan por ofrece productonan pa comunidad na un prijs rasonabel.

Di mesun manera, el a comenta cu nan ta ofrece prijsnan special, por ehemplo 5 florin pa 10 lamunchi. “Nos ta keda den un presupuesto na unda por tin hopi mas producto den e canasta familiar pa un prijs rasonabel, unda cu tin un poder di compra mas halto”, Kelly a afirma.

Kelly tambe a laga sa cu ‘esaki ta algo cu pa nos como famia, e ta algo cu ta inspira nos ora nos ta wak den e comunidad e alegria riba nan cara’.

Pa motibo cu esaki ta un proyecto pa yuda comunidad, Kelly tambe a expresa cu nan no ta worry hopi cu e ganashi. “Nos ta worry pa trece e ayudo na e famia afecta pa e situacion manera nos, pa nan tin cuminda den nan cas”, el a declara.

Ademas, el a comunica cu pa via cu e hunto cu su rumannan homber ta hoben, nan no tin hopi experiencia cu fruta y berdura y tabatin biaha cu nan no tabata diferencia entre un awacati bon y otro cu no. Pa e motibo aki nan a haya experiencia y conseho di nan mesun cliente, pa asina nan sa con e mercado aki ta funciona.

Pa finalisa, Kelly a manifesta cu nan ta pone su clientenan ‘central’, p’esey nan ta haci nan best pa ofrece e miho productonan y batido. Cu nan ta entrepeneur nobo cu kier haci un impacto den comunidad dunando bek. “Nos kier yuda tur hende cu ta acerca nos lo mas cu ta posibel.”