Presidente di parlamento, Juan E. Thijsen a splica tocante locual a pasa siman pasa y e pensamento cu nan tin, cu Hulanda kier haci cambio den e ley LAFT y a duna un reaccion riba locual secretario di estado Knops a bisa den medionan.

Thijsen ta bisa cu kier trece claridad pa via di manipulacion cu tin. Tambe pa pueblo por compronde y sigui e proceso. E ta bisa cu for di 2014, Aruba a haya un Koninklijk Besluit (KB) a base di mal maneho financiero di e gobierno anterior.

Na 2015 Hulanda a cera un protocol cu Aruba, den cual ta bisa cu lo mester bin cu ‘tijdelijk financieel toezicht’, supervision financiero temporal. Den e protocol a pone presion cu mester bin cu ley, “y no a hacie a base di un ley di Reino (Rijkswet, sino a base di un landsverordening, un ley di Aruba.”

Nan a duna autorisacion na Aruba pa nombra (benoemingsbevoegdheid) unda por a institui un Caft, a haya autorisacion pa crea norma (normeringsbevoegdheid) unda ta pone norma pa presupuesto, y como di tres punto Gobierno di Reino ta haya autoridad pa duna instruccion na gobierno di Aruba (aanwijzingsbevoegdheid).

“E acuerdo, manera e secretario di estado ta papia di e tempo ey, ta cu Aruba ta 3 aña bao supervision financiero. Te ora cu ora cu Aruba su debe nacional di 70% baha na un 46%, manera e tabata normal, y Aruba ta haya su propio Begrotingskamer.”

Na november 2018 gobierno actual a firma un protocol den cual ta bisa cu mester cambia e normanan pa e ley. E ta bisa cu Hulanda no ta contento cu e cambionan, pasobra a kita autoridad di nan pa pone esey pa parlamento di Aruba.

Sinembargo, Thijsen ta splica cu e presupuesto cu mester a cambia na 2016 y 2017 no tabata realistico y nan (Hulanda) mester a tuma medida, pero no a hacie, anto esey a haci e debe bira mas grandi, di 70% pa 93%, unda cu pais Aruba tin mas interes pa paga.

“Parlamento ta e organo mas halto cu lo atende e situacion te ora e Begrotingskamer bin. Nan ta menasa cu KB, pero mester bin cu motibo y argumento pa bin cune. Nan no por bin cu KB pasobra no tin un base legal pa e protocol,” Thijsen a splica.

Segun Thijsen e unico momento cu ta pone un KB ta ora cu e pais ta ‘bayendo abao’ y si gobierno no ta haciendo nada pa drecha, pero a yega na un debe di 75% y gobierno ta drechando pa por stabilisa, pa asina no tin mester di un KB. “Nos ta proteha pueblo y haciendo lo corecto.”

Pa locual a pasa dia 20 di september ultimo, el a bisa cu minister president a laga sa cu a haya mas tempo y espacio pa traha. “Esey nos mester, nada mas no a pasa.” E ta agrega cu Hulanda mester duna sosten y no sigui exigi mas medida “pa choca pueblo.”

“Knops a bisa cu nan lo saca CAft; pa motibo cu Hulanda no por duna conseho nan ta sak’e. Pero pakico kit’e? Pasobra si nan saca CAft, e ora e rating agencies ta downgrade Aruba. E meta principal di Aruba ta pa tin economia drecha, problema soluciona”, el a expresa.

Thijsen a bisa cu gobierno ta spera cu parlamento lo tene na cuenta e pensamento y sostene esaki. E ta keda na nan pa dicidi. “Minister di Reino no por duna aanwijzing pero parlamento por manda un gabinete cas.”

“Locual Hulanda ta haciendo cu Aruba ta inhusto, pasobra no por keda sin haci un supervision manera mester ta, sino ta hinca un pais den mas problema. Anto ainda teniendo na cuenta cu gobierno ta atendiendo otro problema cu tin, manera di Venezuela y mas. Nos tin cu para pa nos derecho y pa pueblo,” Thijsen a bisa.