Ayera a anuncia pa comunidad e fayecimento di Juan Chabaya Lampe, miho conoci como ‘Padu del Caribe’ of ‘Tata di Cultura’ di Aruba.

Padu lo keda semper den curason di Aruba, ya cu el a compone varios cantica special dedica pa mamanan y tambe a copia ‘Sonrisa di un baby’, cual el a skirbi den tres idioma. Di mesun manera el a crea e himno nacional ‘Aruba Dushi Tera’ hunto cu Rufo Wever, cual Parlamento di Aruba a aproba oficialmente como himno di Aruba na aña 1976.

Otro cantica cu por wordo considera como un segundo himno pa Aruba, ta e composicion‘Abo so’ cu el a dedica na su casa Daisy Croes, ken despues a fayece na aña 1994.

El a nace dia 26 di april di 1920 y a keda un persona popular den Antias Hulandes y den Caribe como pianista, cantante, autor y pintor. Padu Lampe tabata un artista local cu a bira hopi famoso na Venezuela, Colombia, Merca y Hulanda. Na decada di añanan 50, el a logra bende no menos cu 50 mil copia di su longplay.

El a crece den un ambiente cu hopi alegria musical, p’esey su interes pa musica a cuminsa. Desde su 12 aña. e tabatin agilidad riba clarinet, mandolin y cuarta. Henry Lampe, su tata tambe tabata bon conoci como un pianista y musico

Den un publicacion di e semanario informativo ‘Observador’ di dia 1 di augustus di aña 1962, a resalta e meritonan artistico di Padu y tambe su personalidad sumamente agradabel. A destaca cu Padu tabatin tres merito: como pianista cu un estilo hopi personal y yen di sorpresa; na di dos luga e compositor, cu no tabata conocedo di teoria musical, pero el a demostra invencion den su composicionnan; y di tres luga, Padu del Caribe como propagador di musica crioyo na hopi luga rond di mundo.

Un di e momentonan mas importante cu el a presencia tabata dia cu e prome emisora di radio di Aruba a habri, dia 20 di maart di 1954, unda e tabata acompaña di guitarista Antiyano, Julian Coco y Hubert ‘Lio’ Booi.

Riba tereno di arte y pintura tambe el a demostra su destreza. Durante su hubentud el a pinta un cantidad di cuadra den su propio estilo y na aña 1939, a participa den un exhibicion na New York y a gana un medaya di brons cu su cuadra ‘Typical view of Aruba’.

Padu Lampe tabata un artista multifacetico, inspira pa su interes den parapsicologia y fenomenonan sobrenatural. El a skirbi tres buki riba e topico aki na Papiamento na aña 1986 y cu a wordo publica pa Imprenta Nacional Arubano, cu yudansa financiero di Prins Bernhard Fonds Nederlandse Antillen.

Ademas, na aña 1964 Padu a pasa su examen na ‘Society to Advanced Ethical Hypnosis’ na New Jersey ora el a haya e certificado di hypnotechnician, cu segun e ley na algun estado di Merca, tabata autorisa e poseedor pa practica hipnotismo den casonan manera kibra bicio di humamento, uzo di alcohol y droga, como tambe trata casonan netamente medico.

Den transcurso di añanan el a ricibi diferente plakkaat y diploma di reconocemento, tanto di Aruba como di Corsou, Venezuela y Hulanda.

Cu su musica Padu a hiba e cultura Arubiano rond di mundo, henter isla lo recorda pa su gran contribucion pa cu arte, cultura y herencia.

Departamento di redaccion di Bon Dia Aruba a ricibi door di Fundacion Padu Lampe conhuntamente cu Directie Cultuur Aruba e informacion di su famianan mas cercano, cu ta pidi pa no haci bishita di condolencia na cas di Padu. E entiero y dia di condolencia lo bay ta anuncia despues.

Sosega na paz Padu del Caribe.

 

 

Comments are closed.