ORANJESTAD – Te ainda no ta conoci kende lo reemplasa sr. Jossy Figaroa como director di Aruba Port Authority (APA).

Oficialmente sr. Figaroa lo ta na encargo di e funcion aki te dia 31 di december awor. Pero sr. Figaroa por a compronde for di bureau di minister, Dangui Oduber, cu el lo keda algun luna mas, te ora e decision di kende lo bira e director nobo di APA cay. Ya caba tin varios candidato cu a aplica pa e vacatura aki. Tin algun di nan cu a pasa full e procedura pa nombra un director nobo, locual ta indica cu pronto e mandatario en cuestion ta bay divulga e nomber di e funcionario pa asumi e maneho di APA.

Igualmente, unabes cu e director nobo di APA asumi e funcion aki, lo tin un proceso di transferencia y adaptacion, caminda sr. Figaroa ta dispuesto pa brinda su experticio y conocemento adkiri durante e ultimo cinco aña. Con largo e proceso aki lo bira ta determina cuanto tempo sr. Figaroa lo permanece den APA ainda.

Logronan
Durante un lustro di trayectorio como director di APA, sr. Figaroa, kende prome tabata director di DOW pa aña largo, a declara na Bon Dia Aruba cu mundo nautico tabata henter un mundo nobo p’e.

Logicamente e tabatin experiencia pa maneha administrativamente un funcion asina, y hunto cu Humfrey Tromp, nan a traha un plan strategico pa facilita di bay cu e waf di carga y container for di Playa pa Barcadera.

E logro aki, di bin finalmente cu un waf di carga na Barcadera, tabata un di e logronan y satisfaccion mas grandi di sr. Figaroa den APA. Pero no solamente pone den funcionamento e waf aki, sino cu nan por bin cune denter di e presupuesto y tempo stipula. Otro di e satisfaccion grandi di sr. Figaroa como director di APA ta di por mira un desaroyo positivo di cantidad di turista crucero, cu ta sigui aumenta keto bay. Pero cu tambe APA por atende cu nan ariba waf di Playa, sin cu tin keho. Durante encuesta pa midi e satisfaccion di e turistanan crucero, con nan ta haya e waf di crucero y con nan ta haya Aruba, nos ta ‘hayando cifranan bunita’.

Tambe nan a yega di traha e plan di Port City, cu ta carga parcialmente aprobacion di gobierno actual, ta yena sr. Figaroa di satisfaccion durante su 5 aña den APA. Igualmente, pronto APA lo haya un tugboat nobo cu ta na caminda caba; esaki ta cosnan cu e director saliente di APA ta considera como un desaroyo positivo di nos waf.

Restructuracion y finansas
Pero un aspecto importante cu e ta laga atras pa esun cu lo asumi e funcion di director nobo di APA, ta cu e ta laga un base financiero solido. “No tin un compania cu ta traha drechi sin tin un base finaciero solido,” el a expresa na e matutino aki. E ta haya fundamental pa APA sigui crece pa medio di un base financiero saludabel.

Ya caba, casi na final di su carera como director di APA, sr. Figaroa a bisa cu e no ta laga nada atras cu e lo kier a realisa. “Tur locual mi tabatin pensa of kere cu mester a haci, mi a haci e,” el a bisa na Bon Dia Aruba.

E ta recorda cu primordialmente el a bin den e funcion aki como director di APA pa percura pa e proyecto di mudamento di waf di Playa bay Barcadera sin ningun problema. Despues nan a bay como team di APA pa e parti di mundo crucero hunto cu nan partnernan, y tambe na e vision di e minister, e sector aki di nos industria di turismo ta canando bon.

Pero tambe e trahamento riba e Port City, cu otro aña lo conoce algun movecion, ta proyectonan di nan agenda pa haci y cu nan a logra pa haci nan. E no ta bay cu e sentimento di ‘miho mi a logra….’ Un aspecto cu nan ta trahando actualmente tin di haber cu reorganisacion of restructuracion di APA. E ta un proceso cu mester tuma luga, no di biaha, sino cu e mester bay man den man cu e plannan nobo, ya cu nan mester tene cuenta cu nan personal.

E ta haya cu e trabou cu e proyecto di Port City ta demanda nan mester otro tipo di hende. Si APA su situacion financiero ta sigui saludabel, nan lo bay busca mas hende specificamente pa realisa e trabou cu tin di haber cu e proyecto menciona.

Ya caba, casi na bispo di Pasco y Fin di Aña, sr. Figaroa su ultimo mensahe como director di APA ta esun cu nan no t’ey pa APA so. “Nos t’ey pa Aruba!,” el a bisa. Nan kier, hunto cu gobierno, pa sigui realisa un trabou caminda pueblo di Aruba por ta contento. APA lo sigui traha duro pa bienestar di Aruba. Den nomber di APA, sr. Figaroa ta desea henter pueblo di Aruba un feliz dia y Pasco y un feliz 2019; y pa ‘tur nan deseonan sea cumpli’.