Director di Banco di Seguro Social (SVb),  Edwin Jacobs a expresa su satisfaccion con e proceso pa digitalisa di tur nan servicionan pa publico prome cu 2020, ta bayendo. Ya caba nan a cuminsa cu e digitalisacion pa notifica AO y e aceptacion ta hopi grandi. Tambe e declaracionnan exigi pa Dimas pa un trahado di afo por tramita su permiso di estadia por wordo haci digitalmente, pero mas proyecto ta na caminda.

Sinembargo sr. Jacobs  a adverti categoricamente cu e sa cu den otro departamentonan di gobierno intentonan a wordo haci pa falsifica nan documentonan. Pero nan sistema no ta permiti falsificacion.

P’esey e kier informa tur persona cu ta haci uzo  di e declaracion digital di SVb, cu  nan tin un sistema di control fuerte entre nan cu Dimas. “Cualkier intento di falsificacion ta wordo sigui cu un denuncia na Ministerio Publico”, el  a declara na Bon Dia Aruba. Ademas esun cu ta intenta comete falsificacion ta daña tur su proceso pa bo por yega na bo permiso.

Proyectonan di digitalisacion
Christian Garcia ta funcionario encarga cu e sector di riesgo den SVb y cu e proyecto  entre SVb y Dimas. Pero tambe cu un proyecto nobo cu ta e digitalisacion di inscripcion pa empleado. E prome proyecto  ta encera cu for di mita di 2016  Dimas  a introduci  un rekisito nobo cu e trahado mester registra cerca SVb pa asina e por traha protegi socialmente; pero tambe e empresa mester ta registra tambe.

E dos declaracion aki exigi pa e trahado di afo por diligencia su permiso cerca Dimas, nan por haci nan mediante e website di SVb. Pero e trahado mester busca despues e documentonan aki personalmente den un laso di un pa dos dia locual tabatin ocasion cu e rij tabata largo pa busca nan.  Pa alivia y trece solucion, SVb a introduci e digitalisacion completamente di e proceso aki.

Danki na  e sistema aki tur trahado of empresa cu tin mester di e documento aki, nan por solicita e documentonan aki mediante SVb su website. Nan por haya e documentonan aki digital den e e-mail adres di e solicitante.   Kiermen cu e trahado ni e dunado di trabou no tin cu bay personalmente na SVb, ya sea pa aplica of busca e documentonan aki.

Sr. Garcia ta splica cu e proceso aki ta hopi facil; y e tin su beneficionan grandi ya cu bo ta spaar tempo y gasolin. Gewoon e dunado di trabou of e trabou mester bay riba e website di SVb, y e por bay  ya sea na e link cu ta bisa doño di trabou of trahado; y eynan full abou e ta bay haya e link pa bo peticion di Dimas  of declaracion cu bo mester. Bo mester yena prome cierto informacion exigi digitalmente.

E unico exigencia cu SVb tin pa e exigencia di nan formato digital ta cu den caso di e trahado e mester anexa un copia di su ID. E por trahado por djis saca un potret di e documento of scanner  y mand’e pa SVb. Mientras pa e empresa nan ta exigi un potret of un copia di e registracion den Camara di Comercio (KvK) di e doño di empresa. “Esaki ta pa djis sigura cu e persona cu ta solicitando e documento ta esun cu tin autorisacion pa haci esaki”, sr. Garcia ta bisa.

Despues di e solicitud digital e proceso pa bo haya bo declaracion ta tarda entre 24 ora pa dos dia. Te aworaki nan ta up date,  kiermen si bo ta solicita awor denter di 24 ora bo tin chens di haya un contesta. Nan ta haya un promedio di 40 solicitud via digital pa dia cu ta un cantidad considerabel.

Digitalisacion inscripcion pa empleado
E proyecto di digitalisacion di inscripcion pa empleado ta den proceso ainda. Pronto nan lo bay informa comunidad cu e proceso di inscripcion di empleado via digital ta un realidad; y no necesariamente e mester ta personalmente cerca nan oficina. Ta asina cu via e website di SVb cada doño di compania lo haya un “password” y un “user name”, pa e por tin acceso riba e website di SVb. Ora cu e tin acceso e por haya e formulario di inscripcion disponibel unda e por yena tur informacion di e empleado nobo. Despues e por mand’e via e website mes pa nan. “Esaki kiermen cu e empleado no mester bin mas cerca nos.  E ta bira un intercambio di comunicacion entre e doño di e trabou cu SVb.  “Nos kier hacie hopi mas facil pa e empleado y pa e compania”,  sr. Garcia ta laga sa.

E  proyecto aki ta den proceso ainda, pero e ta bayendo bon. Nan  ta trahando riba e prome stap cu ta actualisa tur informacion di e companianan. Tambe nan mester manda un e-mail oficial di e empresa, ya cu esaki ta un dato importante pa nan pa asina nan verifica cu e informacion cu nan ta haya, ta esun corecto di e empresa.  Nan ta cuminsa manda formularionan pa asina e doño di trabou cuminsa actualisa tur informacion di nan empresa y mand’e via un e-mail of personalmente pa SVb.