Josephine Albertus di SIMAR tocante eliminacion di recorte di salario: “No ta pasobra ta bay back na 100%, bo ta haya un aumento di salario”

Mediante un anuncio realisa pa Sindicato di Maestro di Aruba (SIMAR) ayera den oranan di merdia, a wordo publica e landsbesluit di dia 29 di december 2022 unda ta informa cu empleadonan publico no lo tin mas recorte den nan salario.

For di mei di aña 2020 Aruba a confronta cu un situacion economico, social y di salud basta dificil ora pandemia di Covid-19 a yega na e isla, for di e momento ey empleadonan publico, semi-publico y hasta priva mester a haci entrega di parti di nan salario pa entre otro, por contribui na e Fondo di Asistencia Social di Emergencia (FASE) pa yuda esnan cu mas a wordo afecta pa e pandemia na e momento ey.

Sinembargo, na aña 2022 economia y finansas publico a cuminsa recupera di e duro golpi di pandemia unda turismo mester a reestablece na casi un 100% na final di aña manera a bira conoci, pa e motibo aki, na juli 2022 Gobierno di Aruba a sigura cu empleadonan lo cuminsa haya e 5% back di nan salario pero con cierto condicion.

Pa cu esaki, Bon Dia Aruba a tuma contacto cu Josephine Albertus ken pa cuater aña ta bin fungiendo como presidente di e sindicato SIMAR y cu na final di e luna aki ta bay entrega su funcion na e presidente nobo cu miembronan di sindicato den e veld di enseñansa ta bay scoge.

El expresa cu pa loke ta trata entregamento di salario di 12.6% tabata un lucha cu nan como empleadonan publico tabatin for di mas di dos aña, el a mencion cu for di principio gobierno tabata papia cu tanten cu Aruba tin e landspakette nan mester a sigui cu entrega di 12.6%.

“Nos a para duro, nos a scucha nos miembronan y scucha e veld unda nan ta bisa cu tabata imposibel cu cosnan ta bayendo asina bon na Aruba y ainda tin cu sigui entrega, esey a buta cu aña pasa na juli e 5% cu nan mester a entrega a cambia na nada, nan a kier a duna e 5% back pero mester a entrega 13 ATV-dag unda nos a bisa cu ta mesun cos nos ta kedando pa e 12.6%,” Albertus a señala.

Di e anuncio cu e aña aki nan ta bay haya nan pago completo “esey kiermen cu e aña aki tur e pagonan ta bay na 100% y esey ta e entrada total di e trahado, aunke nos sa cu nos no ta bay wak’e ainda, pasobra aworaki na januari tambe nan ta haya un premie pero nunca esey tabatin di haber cu e recorte, pasobra e recorte a drenta den vigor 1 di mei pa december, na juni ta e prome momentonan cu nan por wak e parti di e vakantieuitkering y despues na augustus y november nan ta bay wak cu tur cos ta na 100% back,” el a bisa.

Asina mes, el a indica cu nan ta hopi contento y a gradici esnan cu a sostene nan debi cu “e lucha no tabata facil y toch nos a logra di yega akinan y awo lo tin cu sigui pa motibo cu costo di bida ta subiendo, no ta pasobra bay back 100% bo ta haya un subida di salario, bo a bay back unda bo tabata ta caba, nos no a subi pa bay mas miho, eynan mi ta kere e siguiente directiva lo tin cu sigui eynan unda costo pa servicionan a aumenta, nos salarionan tambe lo mester tene un subida riba esaki, esey ta e siguiente stap,” Albertus a sigura.

E recorte a cuminsa na mei di aña 2020 te cu aworaki unda nan tabata haciel’e pa solidaridad, pa asina por yuda esnan cu a perde nan trabou den pandemia pero despues e cosnan a bay den otro direccion manera el a sigura “nos a wak con gobierno un dia a pasa un ley y despues bo ta ripara cu no, tabata un acuerdo cu nan a bin cune cu Hulanda, awor nan ta contento pa tende y awo via un afkondigingsblad cu a sali oficial, e recorte a termina,” el a comenta.

Igualmente, a informa cu pa final di e luna aki ta bay tuma luga eleccion di directiva nobo pa e añanan sindical 2023-2025 unda for di dialuna 9 te 24 nan a habri e postulacion pa esunnan cu kier forma parti di e directiva, Albertus a indica cu su persona no ta bay postula mas pa motibo cu mester di un otro hende nobo pa e funcion aki.

Riba un diasabra 28 di januari for di 3pm pa 7pm e miembronan por acerca te sede di SIMAR pa nan vota y saca tur e posicionnan den e directiva cu segun statuutnan di e sindicato den articulo 8, inciso 2 y 3 e directiva ta consisti di minimo 5 y maximo 7 miembro, bao di e cual mester tin un presidente, un secretario y un tesorero.

Cada posicion tin su rekisitonan unda e proximo presidente di sindicato SIMAR mester keda pendiente di e desaroyo den e comunidad den general, envolvi den e mundo di enseñansa unda e ta studia y analisa e desaroyonan aki y ta discuti cu e miembronan di e directiva y ta reaccion ariba esaki den prensa, pa medio di entrevista of comunicado, e presidente ta pendiente di e posicion huridico di maestronan miembronan di SIMAR, ta pendiente cu su conseho huridico y abogado di sindicato, ta percura pa comunicacion cu gobierno, parlamento, lidernan sindical, directivanan di scol departamentonan di enseñansa, IPA, Universidad di Aruba, entre otronan mas.

Door cu Albertus no lo t’ey mas den sindicato y a bay biba na otro pais, igualmente e mester bin back Aruba pa haci e traspaso di e funcion y pa e votacion, tambe el a sigura cu semper si tin algo e directiva nobo por comunica cune pa dun’e su punto di bista.