Diamars atardi na sede di Sindicato di Maestronan di Aruba (SIMAR) a tuma luga un reunion di trahadonan den area di enseñansa pa asina nan por fiha nan posicion y duna un contesta na Gobierno di Aruba pa loke ta trata e kort geding cu te ainda no a finalisa.

Josephine Albertus den un entrevista cu Bon Dia Aruba a menciona cu diamars ultimo, dia 22 di maart a tuma luga na sede di SIMAR un reunion den cual nan a duna informacion na e veld tocante e documento cu gobierno a entrega y tambe nan a splica cronologicamente for di 2020 te awor con e proceso a cana.

Esaki ta pa mustra cosnan cu a sali afo den e documento, loke hues a puntra y asina ey haya un mandato di nan pa wak loke SIMAR a propone. Nan kier keda riba nan meta principal, segun Albertus a sigura, caminda cu ora nan a wordo manda corte cu e kort geding tabata pa motibo cu nan kier a traha ekivalente na e oranan pa cual nan ta wordo paga.

“Ta lamentabel pa wak cu gobierno no a haci nada. Nan mester a haci algo pa hues y nan no a haci nada, loke nan a manda ta mescos cu loke nan a papia di dje den corte y no tin nada nobo. Nan a manda e landspakket cu tur hende a wak, pero esey no ta loke a wordo pidi na bo”, el a sigura.

SIMAR tabata wardando un plan structural pa mira con ta bay baha pa reemplasa den transcurso di un of dos aña posiblemente segun el a trece dilanti. Ademas den un reunion Albertus a bisa cu nan a vocifera cu gobierno ta bisa un cos y den documento cu nan a entrega ta bisa otro.

Den conferencia di prensa, gobierno a indica cu pa mei di e aña aki nan no mester di ayudo mas di Hulanda, cu Aruba lo logra. Pero den documento cu nan a entrega dia 16 di maart na corte, ta señala cu “por lo pronto nos tin mester di keda haya ayudo di Hulanda”. “Dus bo ta contradeci bo mes y tambe loke a sali den e documento, cu CAft ta bisa gobierno pa bin cu otro opcion, pero e mester keda un budget neutral, pasobra aworaki bo ta kita di nos 12.6% – e ta un suma, ora bo haci un cambio e suma ey tin cu keda mesun cos. Nan ta puntra si ta duna e trahadonan 5% back na salario, con bo por mustra mi cu na otro caminda door di haci of aplica esey, e ta keda budget neutral?” el a bisa.

Aworaki loke na a bin cune ta e rebaha di oranan ta keda budget neutral pa motibo cu nan ta keda cu e mesun suma. “Nos meta principal ta pa kita e 12.6%, elimina e recorte riba e salario di e trahado di e veld di enseñansa. Y tanten cu bo no por elimina esaki, nos ta bay traha ekivalente na e porcentahe cu nos ta ser paga. Nos ta ser paga 87.4% y nos ta bay traha 87.4%. Esey ta eigenlijk cu loke nos a sali afo, pasobra esey tabata nos meta na cuminsamento di e aña aki cu a ocasiona cu gobierno a manda nos corte”, Albertus a señala.

E reaccion di e veld diamars ultimo, segun el a informa, ta “cu e veld no ta contento. Nan ta haya cu gobierno ta rek y loke nos ta haciendo ta cu nos tin cu cana e proceso. Gobierno a hiba nos corte 1 di februari na unda nos a haya un ordemaatregel, 11 di februari nos mester a bay corte y nos tin cu caba e proceso aki”, el a comenta.

Di e tussenvonnis di 16 di maart, gobierno mester a entrega un documento, nan a entreg’e y awor SIMAR tin dos siman pa reacciona riba dje. Prome cu reacciona riba dje nan a bay hunto cu e veld den un reunion pa haya nan opinion tocante e documento, na unda sindicato a haya un mandato unda nan lo sinta cu e abogado y informa nan puntonan pa entrega e reaccion pa corte dia 30 di maart.

Ta importante pa destaca cu gobierno a informa cu Standard & Poor’s Global a evalua pais Aruba y a confirma cu Aruba ta un caminda sigur pa inversionistanan. Minister di Finanzas, Xiomara Maduro a señala cu esaki ta un noticia importante pa e pais. Tambe ayera atardi a publica cu Fitch Affirms ta afirma cu Aruba su rating y outlook ta keda stabiel, algo cu pa Albertus ta contradictorio, pa motibo cu e documento cu gobierno a entrega na corte ta indica otro cos.

“Nan mes ta bisa akiden cu nan no por fia placa tanten cu Hulanda no para garantia. Nan ta haci como si fuera cu tur cos ta bon, pero e documento cu nan ta manda ta bisa cu tin un debe awor di 918 miyon florin cu Hulanda. Nan tambe ta bisa cu si nos economia ta subi y tur cos ta cuminsa bay miho, nos no lo tin suficiente placa pa nos por paga e debe, dus nos mannan ta mara”, el a manifesta.

Nan ta pensa cu e situacion ta hopi contradictorio y cu awor e proceso cu ta den man di hues, nan tin cu zorg pa nan trece nan informacion y puntonan pa dilanti. Mescos cu na februari nan a bay cu un dossier di documento bastante extenso pa duna nan puntonan, awor nan lo haci mesun cos pero “lamentabel ta pa wak cu gobierno ta bisa un cos eyfo y den nan documento cu nan ta manda hues nan ta bisa otro”, Albertus a expresa.

Igualmente Albertus a trece dilanti cu prome minister Evelyn Wever-Croes a bisa siman pasa cu nan no tin nodo di tuma e conseho di CAft. “Cu nan mes por haci loke nan kier, y akinan nan ta duna nos un proposicion cu nan ta bezig cune. Pero alabes nan ta bisa nos cu nos no por eigenlijk bisa nada di e proposicion ainda, pasobra nan no a presente na CAft ni na rijksministerraad, loke ta nifica cu bo ta contradiciendo bo mes”, Albertus a finalisa.