Jose Dirksz: KPA ta contra legalisacion di marihuana

Durante entrevista cu Bon Dia Aruba a haci cu presidente di SPA Jose Dirksz, el a splica cu na e momentonan aki Cuerpo Policial completo ta contra legalisacion di marihuana.

Dirksz a expresa cu nan como polis ta bay duna asistencia na cas di hende y den ora ey nan ta wak con e mama ta sufri ora cu tin yiu of famia den adiccion, pa e motibo aki el a sigura cu “Un polis nunca por ta di acuerdo cu legalisacion di marihuana pasobra e ta desastroso pa un pais”.

Segun Dirksz a comenta, Aruba no tin un departamentonan adecua pa tuma e hendenan aki y di manera aki nan ta haya cu mas hende manera loco ta cana riba caya. Esaki ta un di e efectonan di humamento di marihuana na largo plaso ta e malesa psicologico di schizofrenia.

Tocante esaki, el a bisa cu e malesa ey ta permiti cu e persona por tin diferente personalidad y esey ta un problema pa motibo cu un persona cu tabata sufri di esey un polis a perde su bida algun aña pasa. El a splica cu e polis en cuestion a bay duna asistencia y a wordo sorpresa pa e persona cu tabata sufri di schizofrenia y esey a causa su morto lagando un dolor hopi grandi den nan curason.

Loke Dirksz a trece dilanti cu loke nan kier expresa ta cu nan no kier cu mas caso lo pasa asina na Aruba, ta existi personanan cu ta cana rond di scolnan y esey por trece consecuencianan grave pa e muchanan y henter comunidad, esaki ta algo cu ta cientificamente comproba, Dirksz a bisa.

Di mesun manera, el a splica cu nan a trece dilanti e tema aki pa motibo cu pueblo ta den un pais democratico, pueblo ta scoge su parlamentarionan y den ora ey ta e deber di pueblo pa exigi pa e parlamentarionan cu nan a vota pa no acepta e ley di aprobacion di marihuana.

El a señala cu ta un deber moral di pueblo di no ta acepta e ley, pero Parlamento ta encarga di haci esey, no polis ni pueblo.

Tocante indexering, el a expresa cu diahuebs awor tin un reunion cu tur e otro sindicato pa wak kico e miembronan ta desea pa motibo cu sindicato ta traha riba mandato di nan miembronan y nan lo kier trece dilanti pa mira con nan por resolve e tema aki.