E aña aki Asociacion Trabou di Hubentud (ATHA) ta celebra 10 aña di Poder di Hubentud cu un record di 57 hoben nomina di diferente organisacion. E organisacionnan a nomina e hobennan di edad di 14 pa 17 aña cu a destaca den diferente area entre otro, social, deportivo, cultural, religioso, arte, enseñansa, media y tecnologia. Un di e nominadonan aki ta e hoben Jorlanny Kelly.

Jorlanny ta un hoben di 14 aña di edad ken actualmente e ta bishita Maria College Mavo y lo ta cuminsando examen klas e aña escolar aki. Jorlanny ta un di e hobennan cu a keda nomina pa e proyecto Poder di Hubentud y den un entrevista cu Bon Dia Aruba e ta conta di su experiencia participando den e proyecto aki.

Un di su hobbynan ta baila, y e ta forma parti tambe di un grupo di scout y ademas e ta miembro di Parlamento Hubenil. Su meta pa futuro ta pa bira un cosmetologo of un hurista.

El a splica cu el a wordo nomina pa participa den e proyecto Poder di Hubentud door di Centro di Bario Noord den e categoria di trabou boluntario, danki na e trabou activo cu e ta haci cu e centro di bario.

El a sigui conta cu e experiencia den e proyecto ta diferente, pero uno seguramente unico. “Mi cos faborito ta cu mi a siña cosnan nobo y con pa ta un miho version di mi mes,” el a resalta.

Den su experiencia, Jorlanny a indica, el a encontra tambe algun reto. E aña aki e trayecto di e proyecto ta mas cortico. Den pasado e proyecto aki tabata uno cu tabata dura tres luna mas o menos, pero e biaha aki, despues cu ATHA a analisa y evalua e diferente edicionnan di e proyecto a yega na e conclusion cu e biaha aki lo ta bon pa haciele durante temporada di vakantie grandi.

Esaki riba su mes ta un reto, Jorlanny a indica. El splica cu aunke el a haya tiki tempo pa plania su proyecto, tur cos ta bayendo basta bon, pero toch tin algun reto cu el encontra. Pero a pesar di e retonan aki, e preparacionnan ta den bon caminda.

Jorlanny ta miembro tambe di Parlamento Hubenil. E experiencia aki, el a conta, e ta haya hopi leuk y ta algo diferente di locual hende ta pensa.

“Nos ta haya diferente tayer pa desaroya nos mes como persona y prepara pa reunionnan importante. Mi gusta cu mi ta siña cosnan diferente compara cu na scol y mi ta haya diferente oportunidad pa mi futuro,” el a resalta.

Por ultimo, Jorlanny su mensahe pa hobennan di Aruba; “Hoben sea semper bo mes y no laga loke otro hende bisa cambia ken bo ta como persona.”