(NLTimes) – Joran van der Sloot a ser sentencia na 18 aña den prizon na Peru pa trafico di droga. E homber Hulandes, ken ya caba ta sirbiendo un sentencia di 28 aña largo pa e asesinato di Stephany Flores, lo ta den prizon te cu aña 2045 pa motibo cu un termino di prizon na Peru no por surpasa 35 aña segun De telegraaf a reporta.
Autoridadnan na Peru a acusa Van der Sloot di a trafica cantidadnan grandi di cocaina mientras e tabata den prizon na Juliaca, e abogado di e Hulandes a confirma na e corant. Familiar di un otro prizonero a yuda su persona trafica e droga, scondiendo e contrabando den containernan grandi di caña di sucu.
Segun corte na Peru, Van der Sloot despues a bende e droga na otro prizoneronan y a manda e cocaina den exterior via paketenan postal. Corte a sentencia su persona na 18 aña y 4 luna pa e trafico di droga, cual ta un sentencia igual na loke e fiscalnan a pidi den su contra.
Tambe e ta sospechoso di e disparcion di e hoben di 18 aña Natalee Holloway. E Mericano a perde na Aruba den aña 2005. Oficialmente, Holloway su disparcion nunca a ser resolvi, aunke un reportero Mericano a bisa den mei ultimo cu el a descubri informacion nobo conecta na e caso, cual te ainda e tin cu revela.
Van der Sloot a ser encarcela den aña 2010 pa e asesinato di e hoben di 21 aña Stephany Flores, ken a ser haya bati fatalmente den un hotel na Lima exactamente 5 aña despues di e dia cu Holloway a disparce. Den aña 2012 un corte Peruano a sentencia Van der Sloot na 28 aña den prizon pa e asesinato di Flores.
