Documentonan di corte di Alabama registra diabierna ta indica cu Van der Sloot, sospechoso principal den e desaparicion di Natalee Holloway na 2005, tin intencion di declara su mes culpabel den e caso federal cu ta acus’e di purba extorsiona e mama di Holloway.
Un hues federal a fiha un fecha di audiencia pa dia 18 di october pa Van der Sloot na Birmingham, Alabama. Anteriormente el a declara su mes inocente den e caso.
AP ta reporta cu e e-mailnan manda pa e abogado di Van der Sloot y un vocero di e fiscalnan federal no a wordo contesta inmediatamente e mesun diabierna anochi.
Segun Telegraaf ta reporta, Van der Sloot a cera un acuerdo cu fiscal di Ministerio Publico den cual el a bay di acuerdo pa declara su culpable y si hues acepta e acuerdo aki, e por haya un sentencia reduci. Esaki ta evita tambe un caso largo, cu lo mester a tuma luga na december.
Despues di e sentencia di hues, y den si Van der Sloot no apela e sentencia, e lo bay back pa Lima, Peru pa sinta e resto di su castigo pa e asesinato di Stephany Flores na 2010.
Fiscalnan ta alega cu cinco aña despues di desaparicion di Holloway na Aruba, Van der Sloot a reuni cu John Q. Kelly, un abogado pa famia di Holloway. Segun autoridadnan – y e-mailnan obteni pa The Messenger – Van der Sloot a exigi $250mil a cambio di duna detaye tocante con Natalee a fayece y e paradero di su restonan. Van der Sloot a ricibi un pago inicial di $25mil prome cu reuni cu Kelly na Aruba na mei di 2010, segun un acusacion federal di 2010.
Fiscalnan ta alega cu durante e reunion, Van der Sloot a duna informacion falso riba kico a sucede cu e adolescente desaparecido. El a bisa cu su morto tabata accidental, y cu su tata fayecido, Paulus van der Sloot, a deshaci di su curpa na un sitio di construccion.
E restonan di Holloway nunca a ser haya, e ta keda desaparecido. Un hues na Aruba a declar’e legalmente morto na 2012.
