ORANJESTAD – Joost Meijs, CEO di Eindhoven Airport, desde 1 di september 2019 lo cuminsa fungi den nomber di Royal Schiphol Group como CEO di Aeropuerto Internacional Reina Beatrix; tumando over di James Fazio, cu desde 2014 tabata e aeropuerto su CEO.
Sr. Meijs lo ta responsabel pa e desaroyo di maneho y organisacion, mantencion di contacto cu accionistanan externo, y lo guia aeropuerto su proyecto di expansion, mirando cu e ta duna inicio na un programa di inversion di capital y construccion significante di 5 aña cu un balor di 300 miyon dollar. E hunta di supervision di Eindhoven Airport lo ta en busca di e sucesor adecua den e periodo nos dilanti.
Lagando su posicion existente atras, Meijs lo a traha cu Eindhoven Airport pa 13 aña. El a cuminsa dia1 di maart 2006 como Director of Commercial Services & PR. Despues di un periodo cortico como Deputy Director, el a bira General Manager /CEO di e aeropuerto dia 1 di october, 2008.
Durante su carera na Eindhoven Airport, e aeropuerto a transforma di un aeropuerto cu ta atende mas di 1 miyon pasahero na 2006 pa un aeropuerto cu ta atende mas di 6.5 miyon pasahero na 2019. E segundo aeropuerto den Hulanda ta ofrece conexionnan directo pa mas di 80 destinacion den y pafo di Europa.
Joost Meijs:“Mi ta sumamente orguyoso di e logronan colectivo di e ekipo cu a garantisa e exito di Eindhoven Airport. Mi tabata hopi contento pa guia e aeropuerto unda cu partidonan publico y priva ta encontra otro. Treciendo interesnan cu ta aparenta contrario mas cerca cu ta posibel na otro, a inspira mi desde comienso te final. Na mes momento, mi ta ansioso pa por contribui na e exito di e aeropuerto internacional di Aruba y mi ta hopi impresiona cu tur loke a wordo alcansa te cu aworaki door di James Fazio y su ekipo.”
Jabine van der Meijs, CFO di Royal Schiphol Group: “Bou di e liderazgo di Joost Meijs, Eindhoven Airport a crece den un aeropuerto fuerte – despues di Schiphol birando e segundo aeropuerto den Hulanda – cu tin hopi balor tanto den region como tambe pa Royal Schiphol Group. Joost su conocemento amplio y experiencia lo ta hopi valioso pa sigui desaroya Aeropuerto Internacional Reina Beatrix. Nos ta dese’e hopi exito cu esaki.”
Aeropuerto Internacional Reina Beatrix ta wordo opera y maneha pa Aruba Airport Authority N.V. (AAA). AAA tin un partnership strategico cu Royal Schiphol Group pa 15 aña caba, y su CEO actual Fazio recientemente a anuncia su decision personal pa laga e posicion di CEO di AAA atras na final di e acuerdo di empleo actual, cu ta termina dia 31 di augustus 2019.
Fazio a traha pa Royal Schiphol Group pa e ultimo 22 añanan, despues cu el a cuminsa na 1997 como parti di e ekipo cu a privatisa, desaroya y despues opera JFK su terminal 4, y mas recientemente tabata CEO di aeropuerto di Aruba pa e ultimo 5 añanan. Durante su tempo na Aruba, banda di a alcansa diferente logro, a brinda liderazgo y guia pa e proyecto di expansion Gateway 2030 di aeropuerto. Sr. Fazio a comenta riba e ‘timing’ di su decision: “Mi deseo ta pa ta mas cerca di mi famia y amistadnan y continua cu mi carera bek na New York. Royal Schiphol Group a identifica un candidato como mi sucesor, y den e proximo siman mas o menos e CEO nobo lo bishita Aruba y lo wordo introduci na e Accionista, Hunta di Supervision, y staf di AAA.” Esaki ta un transicion plania pa permiti un transicion di 4 pa 5 luna, y pa prepara e siguiente CEO debidamente pa e proyecto di construccion cu ta na caminda y pa asina e por asumi e responsabilidad pa lidera aeropuerto.
AAA ta gradici Sr. Fazio pa su esfuersonan pa sigui desaroya e aeropuerto creciente y ta desea Sr. Fazio tur cos bon den su siguiente metanan personal y ta yama bonbini na Sr. Joost Meijs na e ekipo di AAA.
