Diaranson anochi a tuma luga ceremonia na Aeropuerto di Aruba, den cual James Fazio a entrega su posicion despues di 5 aña como CEO di AAA pa busca otro oportunidad profesional. Entrante 1 september, Joost Meijs lo tuma e posicion di CEO.

Den presencia di su excelencia gobernador di Aruba, Alfonso Boekhoudt, Prome Minister Evelyn Wever-Croes (MEP), Minister di Turismo, Dangui Oduber (MEP), Minister di Husticia, Andin Bikker (POR), Presidente di Hunta di Supervision Marion Kan, entre otro persona y socio di aeropuerto.

“Aeropuerto di Aruba ta pasando di e fase di planificacion pa e fase di construccion di proyecto Gateway 2030 y mi ta entusiasma di entrega e trabou di CEO na Meijs, kende lo ta e lider, lo guia y motiva henter ekipo pa yega na e obhetivo di expansion di aeropuerto”, Fazio a expresa.

El a bisa cu e ta convenci cu socio y luga interesa den turismo y aviacion lo brinda Meijs e mesun orientacion y confiansa manera nan a duna Fazio. Durante su discurso di despedida, Fazio a bisa cu su tempo na aeropuerto di Aruba no por a tabata asina exitoso sin sosten di personal di AAA.

“Mi ta sigur cu Meijs tambe lo ricibi e mesun sosten. Mi kier enfatisa cu ma disfruta mi tempo na Aruba y mi ta sinti honra di e confiansa cu ma haya pa dirigi e aeropuerto nacional di Aruba durante ultimo 5 aña”, Fazio a bisa.

Tur e mandatario presente a expresa nan gratitud pa e esfuerso di Fazio y na mesun momento a desea Meijs suerte pa e siguiente aña pa hiba ekipo di aeropuerto pa proximo proyecto, awo cu Meijs lo ta responsabel pa desaroyo y organisacion di AAA.

Tambe pa mantene contacto cu parti interesado externo y lo supervisa pa e proyecto importante di inversion y construccion di e capital di 5 aña cu un balor di 300 miyon dollar.

“Mi ta cla pa cuminsa den e posicion cu mucho entusiasmo y determinacion pa concreta tur locual e team a visualisa durante e prome etapa di e proyecto Gateway 2030. Mi ta gradici Fazio pa su orientacion cu el a duna pa aeropuerto pa ultimo 5 aña y nan compromiso pa sigura cu nos ta crusa e meta di Gateway 2030, di un aeropuerto di cual nos tur por ta orguyoso”, Meijs a bisa durante su prome discurso como CEO di AAA.

Despues di e prome discurso di Meijs como CEO, Fazio a entrega simbolicamente su posicion na Meijs cu un helm di construccion, un bachi di siguridad y un shobel.