Musico local Jonathan Thiel, miho conoci como ‘Jeon’, ta splica Bon Dia cu na Aruba sa tin e tendencia cu tur hende kier e ‘pida bolo’ pa nan so y ta bringa otro en bes di uni cabes cu otro pa trece nos musiconan na Aruba pa dilanti, sinembargo tin un speransa pa union entre musiconan na Aruba awor cu temponan ta birando mas moderno y cu aworaki tin asociacionnan di musica nobo cu a lanta pues tin speransa.
”Mi tin 25 aña di edad, for di tempo cu mi a haya tino cu mi a cuminsa wak con cos ta bay mi a ripara cu e musiconan na Aruba no ta uni manera mester. E problema mas grandi ta esey pasobra si nos no ta uni, nos no por yuda otro” , sr.Thiel ta splica.
sr.Thiel ta agrega cu por ehempel den hotelnan unda tin diferente musico, si bo tin un trabao na un casino anto bo ta cobrando 5,000 Florin pa luna, un otro musico por bin e mesun casino y bisa nan cu e lo cobra 1,500 Florin pa luna y bay cu bo trabao. ”Kico ta pasa, nan lo kita e otro musico y tuma esun cu ta cobra mas barata anto akinan nos ta papiando di area di hotel so. E cos aki ta pasando constantemente caminda musiconan ta keda baha prijs anto eynan e guera ta cu no ta hopi hende ta papia di dje. Tin un guera den hotelnan na Aruba cu musiconan anto mayoria di e musiconan aki ta musiconan di akifo. Ki dia nos ta bay tin un solucion? Anto kico ta pasa akifo tambe ta cu tur hende kier come riba e tiki bolo cu tin riba un isla chikito, tur hende kier e anto e bolo aki bo tin cu bringa pe paso ta un tiki so tin”, sr.Thiel ta comenta.
Mester sindicato of organisacionnan central pa yuda musiconan na Aruba
”Mi a mira diferente fundacion lanta y diferente hende pero ami ta kere cu mester bin un hende cu ta mas central. Hopi biaha bo ta haya un hende anto e tin su banda tambe anto e ta e director y cabes di e fundacion locual hopi biaha ta haci cu automaticamente su hendenan lo bay prome. ” sr. Thiel ta splica.
sr.Thiel ta agrega cu e ta haya cu mester tin hende cu sa di e negoshi y sa di e mundo di musica pero cu ta hende hopi central cu kisas a retira mes di musica cu
no tin di haber mas cu musica. ”Nos lo mester di hendenan cu ta super central y cu ta dispuesto pa yuda e musiconan”.
sr.Thiel ta comenta cu den su punto di bista, durante e ultimo añanan aki el a mira diferente locutornan di radio, artistanan for di grandi te chikito cu a wordo ”boycott” na Aruba pa algun of otro motibo. ”Un banda manera Robert su Solo Banda Show cu ta un banda cu semper nan a ”Boycott”, y tambe diferente artista manera Janiro Eisden y hopi mas. Meymey di nos tur algun caminda tin un hende cu no ta gusta nos y e cos principal ta cu tur caminda tin un hende cu tin bos cu tin hopi di bisa ta gewoon cera porta pa motibo cu tin algo personal cu nan, esaki ta algo cu mester stop aki na Aruba pasobra nos ta asina chikito y si nos tur keda cu problema asina nos no lo yega ningun caminda. E bolo no ta grandi y ta tur musico tin cu biba di dje” sr. Thiel ta splica.
sr. Thiel ta agrega cu e speransa ta keda den e man di e siguiente generacion di musiconan cu ta bin anto esaki por cuminsa for di awor pa e futuro por ta miho.
