Prome minister Boris Johnson a priminti ayera di repara divisionnan Britanico riba Brexit, despues cu su apuesta riba eleccion trempan a dun’e un mayoria comandante den Parlamento, y un mandato nobo pa saca su pais for di Union Europeo pa fin di januari.
Johnson a priminti di ‘get Brexit done’, y incomodidad amplio cu e estilo di liderazgo y politicanan socialista di lider di oposicion, Jeremy Corbyn a combina pa duna e partido Conservador 365 asiento den House of Commons, su miho logro desde e ultimo victoria di e icono di e partido, Margaret Thatcher, na 1987. Partido Labor di Corbyn a cay na 203 asiento, 59 menos cu locual a logra dos aña pasa, segun resultado ayera.
E resultadonan ta duna un empuhe nobo pa Johnson pusha su acuerdo di retiro di UE den parlamento. Desde cu a asumi su cargo na juli, el a lidera un gobierno di minoria. Despues cu House of Commons a para su acuerdo di Brexit na fin di october, el a convoca eleccion dos aña trempan cu speransa pa gana un mayoria cla. “Mi lo pone fin na tur e ‘nonsense’, y nos lo logra Brexit na tempo pa dia 31 di januari”, el a bisa mientras su sostenedonan a aplaudi.
Johnson tambe a haci un oferta di paz na Britaniconan kende tabata kier a keda den UE, bisando cu e lo respeta nan ‘sentimentonan caluroso’ y construi un ‘partnership nobo’ cu e bloc, como ‘amigo y igualnan soberano’.
Papiando ayera pafo di 10 Downing Street, el a priminti di caba cu acrimonio tocante Brexit y a urgi e pais pa ‘permiti e reparacion cuminsa’. El a bisa cu e lo traha pa paga bek e confiansa di e votadonan.
Lidernan clave na Europa a señala cu nan tambe ta dispuesto pa cuminsa di nobo. Presidente Frances, Emmanuel Macron a bisa cu ta ora pa construi un futuro comun.
Presidente Mericano, Donald Trump a felicita Johnson pa un ‘tremendo victoria’ y a bisa cu ta anticipando un acuerdo comercial nobo cu Reino Uni.
E magnitud di exito di Johnson tambe a marca un derota doloroso pa Corbyn, kende a priminti pa lidera Labor na victoria cu e ‘campaña di pueblo mas grandi cu nos pais a yega di mira’. Na luga di esey, votadonan a rechasa su intento di cera division tocante Brexit primintiendo otro referendum riba cualkier acuerdo cu UE. E voto tambe a rechasa e resto di agenda di e partido, cual a inclui promesa pa aumenta impuesto na hende rico, aumenta gasto social y nacionalisa industrianan manera entrega di awa, railroad, y Royal Mail.
E siguiente punto clave den politica Britanico por ta Escocia, unda e Scottish National Pary (SNP) a gana 48 di 59 asiento dispponibel diahuebs. Lider di SNP, Nicola Sturgeon a otorga e victoria aplastante cu un campaña enfoca riba demanda pa un segundo referendum riba independencia Escoces. Johnson claramente a rechasa e idea di otro voto, bisando cu Escocia ya a rechasa independencia na 2014.
Pero Sturgeon ta argumenta cu e decision di Reino Uni di bandona UE ta contra deseonan di pueblo Escoces, cu 62 porciento di votadonan Escoces escogiendo pa keda den UE durante referendum di 2016.
E exito enorme di Johnson lo dun’e espacio pa maniobra riba asuntonan aki.
