(AP) – Activistanan di salud na Africa a cuminsa critica Johnson & Johnson pa e exportacion di vacuna produci na Sur Africa pa paisnan na Europa, cual ya caba a inmunisa un cantidad grandi di nan pueblo y te hasta a haci donacion di vacuna na e paisnan cu tin mas necesidad.

E vacuna di un solo dosis J&J a ser exporta di Sur Africa, unda cu nan a ser traha, ignorando e necesidad urgente di vacuna den Africa, unda cu menos di 3% di e continente su populacion di 1.3 biyon a ser completamente vacuna.

E activistanan Sur Africano riba diamars a pidi un descripcion completo di e contract entre e gobierno Sur Africano cu Johnson & Johnson y otro trahadonan di vacuna y menasa cu accion legal pa por ricibi e informacion. Na un conferencia cu prensa diamars, a reacciona na e revelacionnan haci pa The New York Times cu miyones di dosis di J&J produci na ASpen Pharmacare den e ciudad Sur Africano di Geberha (anteriormente Port Elizabeth) ta den proceso di exportacion pa Europa.

E reportahe tambe a alega cu e gobierno Sur Africano a bay di acuerdo pa renuncia nan derecho di prohibi exportacion pa sigura cu Johnson & Johnson por exporta nan vacunanan na exterior.

Aspen, un trahado di medicina Sur Africano, tin un contract cu Johnson & Johnson pa por mescla e componentenan di su vacuna contra di COVID-19, pone esaki den su boter y pone esaki den su paki, un proceso yama ‘fill and finish.’ E ta e prome acuerdo pa vacunanan contra COVID-19 ser caba na Africa, y a ser elogia pa e Union Africano y gobierno Sur Africano como un aumento di produccion di vacuna y distribucion di e vacuna pa e continente.

E factoria na Aspen tin e capacidad di caba mas o menos 220 miyon dosis di e vacuna J&J anualmente.

“Nos ta kere cu e conducta di Johnson & Johnson ta controversial, inmoral y no ta bay di acuerdo cu e constitucion,” Fatima Hassan di e Health Justice Initiative a bisa, un grupo cu ta boga pa inhusticianan den sector di salud na Sur Africa a bisa diamars.

E organisacion ya a entrega un peticion bao di e acto South Africa Promotion of Access to Information pa asina por ricibi acceso na e contractnan.