Actor Mericano, Jonny Depp, ken The Sun a describi como un casa violento cu su ex-esposa Amber Heard na 2018, ayera a perde su huicio pa difamacion contra e corant sensacionalista Britanico, cu segun hues, a skirbi algo ‘substancialmente berdadero’.
“E acusadonan a demostra cu loke nan a publica, den sentido cu nan palabranan tin segun ami a compronde, ta substancialmente berdadero”, hues Andrew Nicol a afirma anunciando su veredicto den e caso mediatico aki.
E proceso, celebra na juli dilanti di Corte Supremo na London, tabata bay tocante un titular na april di 2018 den cual The Sun tabata puntra su mes con e escritor Britanico, J. K. Rowling por a acepta e ‘batido di esposa’ ey den e pelicula ‘Fantastic Beasts’.
Durante tres siman, e tribunal na London a scucha storianan horibel tocante abuso di droga, feces riba cama, sospecha di infidelidad y un dede kibra cu un boter durante un pelea violento.
Hopi a puntra nan mes pakico cu su 57 aña di edad un di e actornan mas famoso di Hollywood a core riesgo di expone su intimidad y su estilo di bida extravagante den bista di tur. Depp a sigura cu e frase escrito pa e corante Ingles a cambia su imagen na Hollywood, poniendo su carera den peliger.
Pasobra a menciona Depp na e ‘mesun nivel cu e magnate di cine Harvey Weinstein’, a demanda e editor News Group Newspapers (NGN) y su director ehecutivo Dan Wootton, pa laba un reputacion cu awo por termina mas sushi ainda pa e decision hudicial aki.
NGN a defende cu nan a basa riba 14 supuesto caso di abuso di Depp contra Heard, cual a detaya durante e proceso.
Hues Nicol a bisa cu el a yega na e conclusionnan aki despues di examina den detaye e 14 incidente den cual e acusadonan a basa nan mes, como tambe consideracionnan general presenta pa e acusador.
