(AP) – Johnny Depp tin 3 dia largo caba ta testigua den un huicio cu, en teoria, ta trata e pregunta si Amber Heard a difama su persona den e edicion di corant op-ed publica den aña 2018.

E huicio a bira un espectaculo den cual Johnny Depp ta testigua tocante tur cos, desde bebe pildo tempo cu e tabata mucha te na un colapso mental den cual el a usa su dede corta pa skirbi riba muraya den sanger tur e mentiranan cu su ex pareha a bisa.

Heard su abogadonan a adverti cu e huicio lo bira un show cu lo expone e “Johnny Depp di berdad.” Depp ta nenga cu el a abusa di Heard, apesar di e atencion publico cu a ser poni riba su uso di droga y mensahenan di texto violento, el a bisa cu e ta obsesiona den revela e berdad y no kier decepciona e personanan cu tabata admira su persona.

“Mi meta ta di expone e berdad, pa motibo cu el a matami cu tur e personanan cu mi a conoce durante e añanan, lo pensa cu mi tabata un fraude,” Depp a testigua diamars.

E actor a bisa cu su carera a sufri hopi despues cu Heard a skirbi e relato den The Washington Post den cual el a referi su mes como un “figura publico representando violencia domestico.”

Heard nunca a menciona Depp pa nomber, sinembargo Depp su abogadonan a bisa cu e tabata un referencia cla na e acusacionnan cu Heard a haci ora cu el a pidi un orden di alehamento den contra di Depp.

Depp a bisa cu e acusacionnan aki den e articulo a saca su persona fuera di Hollywood, y a costa su rol den e franquisia “Pirates of the Caribbean.”

Heard a acusa Depp di fisicamente y sexualmente asalta su persona den varios ocasion prome y durante nan matrimonio, hopi biaha den situacionnan unda cu el a bisa cu Depp a bebe asina hopi cu el a perde tino.

Depp a bisa cu Heard su acusacionnan tocante abuso di substancianan ta “hopi exagera” y cu e nunca tabata fuera di control durante e periodo aki. E pareha a conoce den aña 2009, y a casa den aña 2015, Heard a pidi divorcio un aña despues.

Un di e topiconan principal ta loce a tuma luga durante un buelo priva di Boston pa Los Angeles cu Depp y Heard a tuma mientras e tabata filmando pa e pelicula “Black Mass.”

Heard a bisa cu Depp a asalta su persona durante e buelo mientras cu e tabata bebi.

Depp a testigua cu el a bebe dos pildo oxycodone, un opioide na cual el a admiti cu e tabatin un adiccion den e tempo aki, y a lock su mes den e baño di e avion y a drumi pa asina no mester lidia cu Heard.

El a conta corte cu el a bebe un solo glas di champagne mientras cu e tabata subiendo e vuelo. Sinembargo mensahenan di texto cu el a manda pa Paul Bettany den e tempo aki a haci referencia na mita di un boter di Whiskey, “mil Red Bull Vodka” y dos boter di champagne prome cu e buelo.

Heard su abogadonan tambe a señala na mensahenan di texto cu Depp a manda na Heard despues di e buelo bisando “un biaha mas mi ta haya mi mes ta sinti berguensa y repenti.. mi mester mehora.”

E abogadonan tambe ta enfocando riba mensahenan cu Depp a manda pa Bettany den cual el a expresa un deseo di asesina Heard. Despues di bisa cu e tabata keir a kima su persona, el a skirbi “ban hoga e muhe prome cu nos kime!! Mi lo sigura cu e ta morto despues cu e kima.”

Depp a pidi despensa na e Hurado pa e lenguahe vulgar y a bisa cu “en realidad durante e dolor di e momento cu e tabata sintiendo su mente a drenta lugarnan scur.” Tambe el a compara loke el a skirbi na Thompson Gonzo su estilo, cual hopi biaha ta incorpora lenguahe fuerte y pensamentonan un poco extremo.

E caso te ainda ta desaroyando den huicio.