Musica ta algo cu ta casi indispensabel den nos bida, ta un medio di expresion universal cu tin hopi efecto positivo pa e ser humano. P’esey Stichting Leerorkest Aruba a tuma e decision di trece musica den klas pa muchanan y asina nan por cuminsa siña y haci musica cu e colaboracion di Leerorkest di Amsterdam.

Bon Dia Aruba a haci un entrevista cu Johnny Croes, ken ta e lider di proyecto Leerorkest Aruba. Croes a splica cu e proyecto a cuminsa na september di 2019, tempo cu el a manda un carta pa Leerorkest di Amsterdam pa wak e posibilidadnan pa Aruba por forma un Leerorkest igual cu Corsou.

For di eynan a cuminsa e proceso cu un reunion cu minister di Husticia, Andin Bikker y Armando Lampe di Enseñansa di Aruba, durante cual a firma hunto cu minister di Husticia di Hulanda un ‘Letter of Intent’, loke a nifica un colaboracion entre Gobierno di Aruba y Hulanda pa por inicia cu e proyecto aki.

Asina, musica a yega na dos scol di Aruba den forma di un proyecto piloto na klas dos y tres di Colegio Laura Wernet Paskel y klas dos di Prinses Amalia Basisschool. Aki a cuminsa cu les di Algemene Muzikale Vorming (AMV) loke ta un preparacion fundamental di kico ta musica.

Den e luna di februari, docentenan di Leerorkest Aruba a uni cu nan coleganan di Leerorkest Curaçao y Leerorkest Bonaire pa un tayer intenso, bou encargo di Leerorkest Amsterdam. Docentenan di Hulanda a comparti nan conocemento y experiencia, pa asina yuda e diferente islanan den nan afan pa contribui na desaroyo di tur mucha.

Di mesun manera, Croes a menciona cu nan a haya 144 instrumento for di Hulanda como trompet, trombone, clarinet por ehemplo. E prome paso tabata pa e muchanan haya AMV y di dos fase tabata pa muchanan cuminsa toca instrumento. Di esaki el a trece dilanti cu e instrumentonan a yega na luna di februari/ comienso di maart, na unda e muchanan a cuminsa haya e introduccion y prome lesnan cu instrumento, pero e dianan ey e crisis di Covid-19 a yega na Aruba.

El a informa cu tur cos a wordo cancela y pa via di esey nan purba di organisa algun les hunto cu canal Telearuba, pa asina e muchanan por probecha e momentonan di cuarentena pa sigui siña musica na cas.

Croes a bisa cu nan a traha aproximadamente seis programa, pa muchanan por haci nan les cu instrumento y asina nan por bira mas creativo. A laga nan traha un instrumento di percusion, guitara of cuarta, cu tur material cu nan por haya den nan cas hunto cu famia na e momentonan cu nan no por a sali pa via di e cuarentena di Covid-19.

“E filosofia di Leerorkest ta musica pa tur mucha, no necesariamente tin cu bira musico, pero musica ta pa nan desaroyo positivo, pa evita cu nan por bay den mal caminda”, Croes a resalta.

Ademas Croes a informa cu na e momentonan aki nan ta bezig cu un concierto virtual, na unda e muchanan ta canta y toca instrumento hopi simpel cu e cual nan ta siña e fundeshi di musica. “E idea ta pa tur mucha, sin excepcion, por haya les di musica”, Croes a sigura.

Hunto cu e docentenan, e muchanan lo presenta dos cantica durante cual nan a wordo filma y esey lo bira e presentacion pa diadomingo 26 di juli proximo. Segun loke Croes a menciona, te ainda nan ta bezig cu canal Telearuba pa confirma esey.

Pa siguiente aña escolar, Croes a informa cu nan ta purba di cuminsa cu algun instrumento pero mester tene cuenta cu protocol di prevencion cu Departamento di Salud Publico ta implementa, como tambe cu muchanan no mag di comparti un instrumento, door di higiena.

“Hopi scol a mustra interes pa e programa di LeerOrkest, e vision ta tur scol tin su orkesta of lesnan di musica”, Croes a comenta. Esaki ta nifica cu e fundacion na Aruba mester cuminsa traha riba su fondonan propio, pa continua y amplia e programa, pa asina mas alumno di nos isla haya e mesun oportunidad aki. E intencion ta pa cuminsa cu un curso na IPA pa forma mas docente di musica, pa asina por amplia e oferta di conocemento y tambe cuminsa den e luna di september cu lesnan di AMV online.