Diadomingo ultimo a sosode un incidente cual ta wordo mira manera e tiramento di mas grandi den historia Mericano na Orlando, Florida. Bon Dia a papia cu sr. John Larmonie, “Medewerker Bureau Communicatie Voorlichting en Preventie KPA”, kende ta splica cu e tipo di situacion nan aki tambe por presenta nan mes na Aruba no solamente pasobra nos tambe ta un destinacion turistico, pero e echo tambe cu tin hopi arma di candela riba caya.
Mas cu 50 hende a wordo tira mata y alrededor di otro 50 hende cu a ser herida den un tiramento den un discoteca na Orlando. Esaki segun sr. Larmonie, na Merca e tipo di sucesonan aki ta pasa mas frecuente pa motibo cu ta permiti pa ley di cana cu arma. Sinembargo, Orlando ta un destinacion turistico y segun sr. Larmonie, for di basta aña caba a wordo treci pa dilanti cu tin hopi arma drentando Aruba pero ningun hende kier a admiti cu esaki ta berdad.
‘Na Aruba, pa añanan largo nos a hinca cabes bao tera y bisa cu no tin gang of criminalidad aki, pakico? Pasobra nos no kier a admiti cu nos tin un problema na Aruba. Nos tin miedo di bisa esaki pasobra Aruba ta un isla turistico, si nos bisa esaki, mañan esaki lo wordo uza pa kibra nos turismo. Sinembargo, nos di departamento di Preveni Crimen ta bisa cu un problema bo no ta resolve door di nenga cu e t’ey’’ sr. Larmonie ta conta Bon Dia. sr. Larmonie ta bisa cu e prome stap cu Aruba mester cuminsa tuma ta admiti cu tin un problema di arma cu ta bayendo fuera di control tur aña, y cuminsa traha un plan pa aplica esaki prome cu tragedia manera ta pasando na Merca cuminsa sosode aki nan fuera di e hecho cu nos no tin e mesun leynan. ‘Locual a cuminsa 10 of 15 aña pasa di muchanan jong bringando den bario, corda bon, cu e mucha nan aki tur a bira grandi y kisas a enfoca nan mes mas den e asunto di arma y gang, nan ta organisa y a cuminsa haci tipo di actividad nan criminal hunto den un grupo. E cosnan aki ta desaroyando y birando grave, si nos no cuminsa actua trempan, nos ta bay haya nos mes den hopi problema. Na Aruba ta ainda style di antes, bo ta warda prome pa e baca hoga pa despues bay pensa di haci algo’, sr. Larmonie ta bisa.
Un di e informacion nan clave segun sr. Larmonie cu FBI a pone riba su website tocante henter e asunto di gang, ta e mensahe na paisnan mas chikito cu no tin e problema. ‘Nan ta bisa cu si bo no tin e problema, wak bon y percura pa e no drenta. Si bo ta mirando e problema ta cuminsando den bo pais, wak pa bo caba cun’e di biaha pasobra e ta bay crece na dado momento cu bo ta bay cuminsa haya problema mescos cu nan na Merca’ sr. Larmonie ta bisa.
No tin castigo grave pa posesion di arma di candela na Aruba
Sr. Larmonie ta splica cu por ehempel na Hapon, un pais cu tin miyones di habitante ,pa aña si bo tin suerte bo ta haya 1 caso di asesinato pa via di arma. ‘Con por ta posibel cu den un pais asina grandi manera Hapon, cu tin asina hopi placa y tanto cos cu miyones di hende anto porta tin manera 1 tiroteo so pa aña? Pasobra Hapon tin un fenomeno cu hopi otro pais no tin. Na Hapon un arma di candela ta un cos mortal. Na Aruba, e pensamento Hulandes ta pa duna hende chens, si haya bo cu arma ki nan, nan ta laga bo bay pasobra ya, bo no a haci nada malo cun’e, bo no a tira atraco of bo no a menasa hende etc., sinembargo na Hapon, si nan gara bo cu un arma di candela so bo por haya te hasta 20 aña. E lista di castigo ta basta grave y pa yam’e den termino nan Hulandes, ‘desproporcional’ , nos na Aruba lo yama esaki asina pasobra pa nan na Hapon por ehempel e tipo di castigo aki ta algo normal” , sr. Larmonie ta bisa.
Como parti di un strategia mas amplio, sr. Larmonie, su sugerencia ta pa nos adopta un medida un tiki drastico cu kisas no ta cuadra cu Hulanda su manera di pensa pero cu cada dia ta mustra di ta necesario pa preveni e tipo di crimen nan aki. ‘Aworaki ta practicamente nada bo ta haya si bo wordo gara cu un arma na Aruba anto e no ta wordo aplica mes. Loke nos ta haciendo como KPA aworaki ta ofreciendo un curso cu bo por haya mas informacion di esaki cerca nos, pasobra nos ta siña di e foutnan di Merca, na Aruba nos tin e luho cu ainda nos no a pasa den nada grave asina ki pues dicon no prepara pe?’ sr. Larmonie ta bisa.
