John Larmonie, “Medewerker Bureau Communicatie Voorlichting en Preventie KPA”, ta splica Bon Dia cu e programa di ”Neighbourhood Watch” ta uno hopi positivo pasobra manera cu un ladron yega un bario caminda tin borchi y sticker pega cu tin ”Neighbourhood Watch” e ta haci esey hopi menos atractivo pa bay horta den e bario pasobra nan sa cu e chens di wordo gara ta hopi mas grandi.
”Ladronnan por purba di intimida un persona den e bario, pero nan no por intimida henter e bario. Si bo manda un WhatsApp anto 20 bisiña sali pafo kico bo ta bay haci mata full e bario?” Sr. Larmonie ta comenta. E concepto di ”Neighbourhood Watch” na Aruba ta basa riba e mesun concepto cu tin full rond mundo caminda Aruba a cuminsa uza esaki ultimamente unda basicamente un grupo di habitante cu ta bini hunto, coopera cu otro y traha un programa pa yuda raporta tur actividadnan sospechoso na polis y den general yuda mantene siguridad den e bario.
”Logica ta dicta cu bo no por tin tur polis tur caminda den e mesun tempo. Ora cu polis ta patruya nan ta bay bario pa bario anto mientras nan por ta ocupa cu un bario, na e otro kisas no lo tin hende ta vigila riba caya anto pa evita cu ladronnan ta haya mal liber , e habitantenan mes ta cuminsa cu un programa di cooperacion unda cu nan ta yuda mantene siguridad den nan bario” ,Sr. Larmonie ta splica.
Sr. Larmonie ta sigui splica cu e idea no ta pa reemplasa polis pasobra nan no tin e autoridad y nan no ta arma, al contrario, nan ta wordo avisa pa no actua riba caya y simplemente tin wowo y horea den e bario. ”Ora cu nan señala cosnan cu no ta bon ,ta notifica autoridad mesora pa autoridad sa unda pa bay precies den e momento cu e ta pasando y tambe tuma number di auto, tuma nota di aparencia di un persona con e ta bisti etc. Pa motibo haci esey, e tin un efecto preventivo den e bario pasobra unabes cu cuminsa coopera cu otro, pone borchi y sticker nan ta ripara cu si a manda un WhatsApp por ehempel, luznan di e bario ta dal cende, portanan ta habri anto e ta intimida e malhechornan pasobra nan ta mira cu e hendenan ta alerta y bon organisa, cu un bon cooperacion cu polis pa bin mesora tambe” , Sr. Larmonie ta splica.
Con pa lanta un Neighbourhood Watch den bo bario
”E iniciativa eigenlijk mester bin for di un hende den e bario. Nos ta propaganda esey anto si hende den e bario tin interes pa haci esey , e ora ey un di nan mester cuminsa tuma e iniciativa pa cuminsa acerca bisiñanan y laga carta den nan mailbox pa tin algun anochi di informacion na cas of na un Centro di Bario. E idea no ta pa nan hinca nan mes den peliger tampoco, e idea ta cu nos manera KPA ta siña nan con pa haci esaki den un manera mas sigur y pa mehora e cooperacion cu tin cu polis tambe.” Sr. Larmonie a bisa.
Sr. Larmonie ta agrega cu un di e prome consehonan cu nan ta duna e hendenan tambe pa bay wak ken ta bo polis di bario pasobra bo polis di bario ta e link entre e habitante y specialmente e Comandante na Warda. ”Por ehempel si e habitantenan ta acerca e polis di bario y bisa nan cu tin tal problema den e bario, e polis por bay na e siguiente paso pa laga e patruyanan controla den cierto areanan riba cierto ora y dia.”
Sr. Larmonie ta bisa. Un di e prome cosnan pa haci si kier start un programa asina ki den bo bario ta pa acerca bo bisiñanan y puntra nan si tin interes. ”Bo no por haci un ”Neighbourhood Watch” bo so e palabra mes ta indica cu mester union di henter e bario. Check cu bo bisiñanan, organisa un reunion y invita un par di hende cu ta interesa, tuma contacto cu nos tambe di Departamento di Prevencion di Crimen KPA y nos ta dispuesto pa yuda bo y duna bo informacion na kico ta e cosnan importante, nos por bin tene un anochi di informacion tambe pero e interes di e bario mester t’ey, si no tin interes e no ta funciona.” Sr. Larmonie a bisa.
