(AP) — Ex-cuidador di bestia di Oklahoma conoci como ‘Tiger King’, Joe Exotic ta retrasando tratamentonan pa cancer di prostaat te despues cu e ricibi su sentencia nobo pa su condena pa un intento di asesinato a sueldo y pa viola leynan federal di bida salvahe, segun un mocion entrega den corte federal.
Joe Exotic, kende su nomber legal ta Joseph Maldonado-Passage y ta referi como Joseph Maldonado den e documentonan entrega diaranson, a anuncia luna pasa cu e tin cancer di prostaat. Algun siman despues a transferi e for un centro medico federal na Fort Worth, Texas, na un centro medico na Butner, North Carolina.
Oficialnan federal a bisa cu Maldonado-Passage ta bay tin mester di hasta ocho siman di tratamento di radiacion y lo ta incapaz di biaha durante e tratamentonan. E mocion a bisa cu su dokternan a bisa Maldonado-Passage cu potr monitor su situacion di forma sigur actualmente.
“Pospone tratamento di radiacion te despues di e sentencia nobo no lo ta dañino pa su salud, ya cu probablemente no ta bay afecta su prognosis of resultado”, segun e documento. “Mirando e declinacion di radiacion y e habilidad pa pospone esaki di acuerdo cu su propio dokternan, Sr. Maldonado no kier pa pospone su audiencia pa sentencia mas”, y ta pidi pa un fecha entre dia 20 y 31 di januari pa su sentencia.
“Adicionalmente, si Sr. Maldonado haya libertad dentro di proximo 6 pa 18 luna, tin opcionnan mas avansa ta disponible p’e”, segun e documento ta declara.
Maldonando-Passage, kende tabata aparece prominentemente den e documental di Netflix, ‘Tiger King: Murder, Mayhem and Madness’ a keda condena pa purba di contrata dos diferente homber pa asesina activista di derechonan animal for di Florida, Carole Baskin, y tambe pa viola leynan federal di bida salvahe. El a ricibi sentencia di 22 aña di prison, pero un corte di apelacion federal na juli a duna veredicto cu e mester ricibi un sentencia di prison mas cortico pasobra e huicio incorectamente a trata ambos condena separa den calcula su termino di prison bao guianan di sentencia.
