(AP) — Un hues federal a resentencia Joe Exotic di ‘Tiger King’ cu 21 aña di prison ayera, reduciendo su castigo cu apenas un aña a pesar di suplica di e anterior criador di bestia pa clemencia mientras e ta cuminsa tratamento pa cancer.
“Please no laga mi muri den prison wardando pa un chens pa ta liber”, el a bisa cu lagrima den su wowo na un hues federal cu a restenci’e pa un acusacion di asesinato a sueldo.
Joe Exotic – kende su nomber real ta Joseph Maldonado-Passage – a keda condena den un caso involucrando activista di bienestar animal, Carole Baskin. Ambos a aparece den e documental di Netflix ‘Tiger King: Murder, Mayhem and Madness’.
Bistiendo paña oraño di prison, Maldonado-Passage, di 58 aña di edad, ainda tabatin su cabey conoci, pero e color blond a cambia na bruin y shinishi.
Baskin y su esposo, Howard Baskin, tambe a atende e proceduranan, y Baskin a bisa cu e tabatin miedo cu Maldonado-Passage por menas’e.
“Ainda e tin sentimentonan intenso di mal deseo na mi persona”, el a bisa e hues.
Baskin a bisa cu hasta cu Maldonado-Passage den prison, el a continua ricibiendo ‘comunicacionnan horibel, abusivo y di menasa’ durante ultimo dos aña. El a bisa e hues cu e ta kere cu Maldonado-Passage ta presenta un menasa mas serio ainda na dje awo cu e tin un grupo di sostenedor mas grandi pa motibo di popularidad di e serie di Netflix.
Abogadonan di Maldonado-Passage a bisa e hues cu nan cliente ta sufriendo di cancer di prostaat etapa uno, ademas di un malesa cu ta compromete su sistema immuun, haciendo e particularmente vulnerable pa Covid-19.
Cancer di prostaat etapa uno ta nifica cu a detecta esaki trempan y e no a plama. Maldonado-Passage anteriormente a bisa cu e tabatin plan pa retrasa tratamento te despues di su sentencia.
Oficialnan federal a bisa cu Maldonado-Passage ta bay tin mester di hasta ocho siman di tratamentonan di radiacion y no lo ta capaz di biaha durante e tratamentonan.
Su abogado, Amy Hanna a bisa e hues cu e no ta ricibiendo cuido medico adecua dentro di sistema di prison federal, y cu un sentencia largo ta ‘un sentencia di morto pa Joe, cual e no ta merece’.
Fiscalnan tambe a bisa e hues diabierna cu Maldonado-Passage a ricibi un accion disciplinario na september pa posesion di un celular di contrabanda y headphones no autorisa, cu no tabata inclui den su reporte pre-sentencia. Palk a agrega cu Maldonado-Passage tabatin cuatro accion disciplinario anterior, maske el a describi esakinan como ‘relativamente menor y no violento’.
E proceduranan di corte ayera a yega despues cu un corte federal di apelacion a duna veredicto aña pasa cu e termino di prison cu e ta sirbiendo pa asesinato a sueldo mester keda reduci.
Sostenedornan a yena e sala di corte, algun bistiendo T-shirt bisando ‘Free Joe Exotic’. Su abogadonan a bisa cu nan ta bay apela e resentencia y peticiona pa un huicio di nobo.
“E defensa a entrega un serie di attachment cu ta mustra participacion excesivo di gobierno den creacion di e ofensa pa cual e ta condena”, abogado Molly Parmer a bisa e reporteronan despues di e audiencia. “Nos ta bay continua nos litigacion post-condena, pero si nos a premira pa e corte e evidencia cu nos tin di nos investigacion post-condena.”
Na januari 2020 a sentencia e ex-cuidador di animal cu 22 aña di prison despues cu el a keda condena di purba di contrata dos homber diferente pa asesina Baskin. Un panel di tres hues di e Corte di Apelacion di 10 Circuito Mericano a bay di acuerdo cu Maldonado-Passage cu e corte mester a trata nan como un condena durante sentencia, pasobra ambos ta trata di e mesun meta di asesina Baskin, kende ta maneha un santuario di rescate pa animalnan na Florida y a critica e trato cu Maldonado-Passage a duna e animalnan.
Fiscalnan a bisa cu Maldonado-Passage a ofrece $10mil na un agente di FBI undercover pa asesina Baskin durante un reunion graba na december 2017. Den e grabacion, el a bisa e agente, ‘djis manera, siguie na parking lot di un centro comercial, y djis mat’e y core bay’. Abogadonan di Maldonado-Passage a bisa cu nan cliente – kende anteriormente tabata opera un zoologico na Wynnewood, Oklahoma, alrededor di 105 kilometer leu di Oklahoma City – no tabata papiando seriamente.
Maldonado-Passage, kende ta insisti riba su inocencia, tambe a keda condena pa asesina cinco tiger, bende puppy di tiger, y falsifica documentonan di bida salvahe.
